Chanzo cha picha, Getty Im
Familia za mateka wa Israel ambao bado wanazuiliwa na Hamas wamesema Waziri Mkuu Benjamin Netanyahu ndiye “kikwazo kimoja” kinachozuia kurejea kwao na kufikia makubaliano ya amani.
Jukwaa la Mateka na Familia Zilizotoweka: Warudisheni Nyumbani Sasa liliandika kwenye mitandao ya kijamii kwamba mashambuliz ya Israel dhidi ya Qatar wiki iliyopita yanaonyesha “kila wakati mpango unapokaribia, Netanyahu anauhujumu”.
Matamshi ya kundi hilo yamekuja baada ya Israel kufanya mashambulizi dhidi ya viongozi wakuu wa Hamas katika mji mkuu wa Qatar wa Doha, ambapo Hamas ilisema iliua wanachama wake watano na afisa wa usalama wa Qatar.
Siku ya Jumamosi, Netanyahu alisema kuwaondoa viongozi wa Hamas nchini Qatar “kutaondoa kikwazo kikuu” cha kuwaachilia mateka na kumaliza vita.
Pia aliishutumu Hamas kwa kuzuia majaribio yote ya kusitisha mapigano ili kuondoa vita huko Gaza.
Waziri wa mambo ya nje wa Marekani Marco Rubio alisafiri kuelekea Israel siku ya Jumamosi na anatazamiwa kukutana na Netanyahu huku Israel ikikabiliwa na shutuma za kimataifa kwa shambulio hilo.
Hatahivyo, familia za mateka zilielezea jibu la Waziri Mkuu wa Israeli kama “kisingizio cha hivi karibuni cha kushindwa kuwarudisha nyumbani” wapendwa wao. “
Operesheni iliyolengwa nchini Qatar ilithibitisha bila shaka yoyote kwamba kuna kikwazo kimoja cha kuwarudisha mateka 48 na kumaliza vita: Waziri Mkuu Netanyahu,” walisema.
“Wakati umefika wa kumaliza visingizio vilivyopangwa kununua muda ili aweze kung’ang’ania madaraka.”
Kundi hilo liliongeza kuwa “kizuizi hicho” kwa Netanyahu kumegharimu “maisha ya mateka 42 na kutishia maisha ya mateka wengine ambao wamenusurika kwa shida”.
Kabla ya kuondoka, Rubio alisema Rais wa Marekani Donald Trump hakufurahishwa na shambulio la Qatar, lakini akasisitiza kuwa uhusiano wa Marekani na Israel ni “nguvu sana”.”
Ni wazi kwamba hatujafurahishwa na hilo, rais hakufurahishwa nalo. Sasa tunahitaji kusonga mbele na kubaini nini kitafuata,” Rubio alisema.