Rais wa Ufaransa Emmanuel Macron anaelekea China leo Jumatano kwa ziara ya kiserikali ya siku tatu inayozingatia mazungumzo ya kibiashara na kidiplomasia huku rais wa Ufaransa akijaribu kuishawishi Beijing kuishinikiza Urusi kuelekea kusitisha mapigano na Ukraine.
Imechapishwa:
Dakika 3 Wakati wa kusoma
Matangazo ya kibiashara
Bw. Macron atatetea mpango wa ushirikiano wa kiuchumi na kibiashara unaolenga kuanzisha usawa unaohakikisha ukuaji endelevu na imara, wenye manufaa kwa wote, ofisi yake imebainisha.
Ufaransa inatarajia kuvutia uwekezaji zaidi kutoka kwa makampuni ya China na kuwezesha upatikanaji wa mauzo yake nje ya soko la China. Wakati wa ziara hii, wawakilishi wa nchi hizo mbili wanatarajiwa kusaini mikataba kadhaa katika sekta za nishati, kilimo, na anga za juu.
Bw. Macron ameahidi kutetea upatikanaji wa soko wa haki na wa pande zote mbili, ofisi yake imesema.
Ufaransa itakuwa mwenyeji wa mkutano wa kilele wa G7 mwaka wa 2026, ukizileta pamoja nchi zilizoendelea zaidi duniani, huku China ikiwa mwenyekiti wa jukwaa la Ushirikiano wa Kiuchumi wa Asia-Pasifiki (APEC), ambalo lina wanachama 21, ikiwa ni pamoja na Marekani, Korea Kusini, Japan, Australia, na Urusi.
Umoja wa Ulaya wenye wanachama 27 una upungufu mkubwa wa kibiashara na China—zaidi ya euro bilioni 300 (dola bilioni 348) mwaka jana. China pekee inachangia 46% ya jumla ya upungufu wa kibiashara wa Ufaransa.
Ufaransa na Umoja wa Ulaya wanaichukulia China kama mshirika, mshindani, na mpinzani wa kimfumo. Miaka ya hivi karibuni imegubikwa na migogoro mingi ya kibiashara katika sekta mbalimbali, kufuatia uchunguzi wa EU kuhusu ruzuku za China kwa magari ya umeme. China ililipiza kisasi kwa kuanzisha uchunguzi kuhusu uagizaji wa pombe kali za Ulaya, nguruwe, na bidhaa za maziwa.
Mnamo mwezi Julai, Emmanuel Macron alikaribisha msamaha uliotolewa kwa wazalishaji wengi wa konyagi, akiuona kama hatua nzuri. Ufaransa ni muuzaji mkuu wa divai na pombe kali wa China.
Mazungumzo kati ya Emmanuel Macron na Rais Xi Jinping pia yatazingatia vita vya Ukraine, hasa baada ya mkutano wa Jumatatu huko Paris na Rais wa Ukraine Volodymyr Zelensky, kuhusu mfumo wa uwezekano wa kusitisha mapigano.
“Tunachotaka ni China iweze kuishawishi na kuishinikiza Urusi ili ikubali haraka iwezekanavyo kusitisha mapigano na kuimarisha usitishaji huo kupitia mazungumzo ambayo, kwa maoni yetu, yanapaswa kufikia dhamana imara ya usalama kwa Ukraine,” afisa mkuu wa kidiplomasia wa Ufaransa amesema.
Paris inatarajia Beijing “kujizuia kuipa Urusi uwezo, wowote ule, ili kuendelea na vita,” afisa huyo ameongeza, akizungumza kwa sharti la kutotajwa jina, kwa mujibu wa itifaki ya rais wa Ufaransa.
Msemaji wa Wizara ya Mambo ya Nje ya China Mao Ning alisema wiki iliyopita kwamba Beijing inaamini katika “mazungumzo na mashauriano” ili kutatua vita nchini Ukraine na inaunga mkono “juhudi zote” ili kufikia amani. Tangu kuanza kwa mzozo wa Ukraine, China “imekuwa na jukumu la kujenga katika kukuza suluhu ya kisiasa kwa mgogoro huo,” amebainisha.
Emmanuel Macron, akiandamana na mkewe Brigitte, anatarajiwa Beijing Jumatano jioni. Anapanga kuzuru eneo la Qianlong Garden, lililojengwa karne ya 18 na lililoko katika Jiji lililopigwa marufuku, ambalo hivi karibuni lilifunguliwa tena kwa umma baada ya ukarabati mkubwa.
Siku ya Alhamisi, Emmanuel Macron atakutana na Xi Jinping katika makao makuu ya Bunge. Viongozi hao wawili watashiriki katika jukwaa la biashara la Ufaransa na China. Mchana, ajenda ya Bw. Macron itajumuisha mazungumzo na Zhao Leji, Mwenyekiti wa Bunge la taifa la China, na Li Qiang, Waziri Mkuu wa China.
Rais wa Ufaransa na mkewe watasafiri hadi Chengdu, katika jimbo la Sichuan nchini China.
Siku ya Ijumaa, Bw. Macron na Bw. Xi watafanya mazungumzo huko Dujiangyan, katika eneo la mojawapo ya mifumo ya umwagiliaji ya zamani zaidi duniani. Kisha Bw. Macron atakutana na wanafunzi kutoka Chuo Kikuu cha Sichuan.