Takriban watoto 100 wameuawa katika mashambulizi ya anga na operesheni za ardhini zilizofanywa na Israel katika ukanda wa Gaza tangu kuanza kwa usitishaji mapigano miezi mitatu iliyopita.
Kwa mujibu wa Shirika la Umoja wa Mataifa la kuwahudumia watoto UNICEF, wavulana 60 na wasichana 40 wamepoteza maisha tangu mapema Oktoba.
Msemaji wa shirika hilo, James Elder, amesema idadi hiyo inaonyesha kuwa mtoto mmoja anauawa kila siku licha ya makubaliano ya kusitisha mapigano.
Wizara ya afya ya Gaza ambayo huhifadhi rekodi za vifo, imeripoti idadi kubwa zaidi—watoto 165 waliouawa wakati wa usitishaji mapigano, kati ya jumla ya vifo 442.
Mkurugenzi wa Idara ya Kompyuta katika wizara hiyo, Zaher Al‑Wahidi, ameliambia shirika la habari la AFP kwamba watoto wengine saba wamefariki kutokana na baridi kali tangu mwanzoni mwa mwaka huu.
Mnamo Januari 1, Israel ilizuia mashirika 37 ya misaada ya kimataifa kuingia Gaza, hatua ambayo Umoja wa Mataifa uliitaja kuwa ya kushangaza na isiyokubalika.