Je, mazungumzo yameanza au la kati ya Washington na Tehran baada ya zaidi ya wiki tatu za mashambulizi? Donald Trump anadai kwamba majadiliano yamekuwa yakiendelea kwa siku kadhaa na kwamba hii ndiyo sababu amejizuia, kwa sasa, kushambulia vituo vya nishati vya Iran. Iran inakanusha hili, ikijibu kwamba hakuna mawasiliano yaliyopo na kwamba rais wa Marekani anatafuta tu kupunguza bei ya mafuta.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu huko Washington, Vincent Souriau
Kulingana na vyanzo vya Gazeti la New York Times, hata kama ni mwanzo tu, mchakato wa majadiliano umeanzishwa kwa lengo la kupata msingi wa pamoja na utawala wa Iran.
Kwa kweli kuna njia ya mawasiliano. Taarifa hiyo imethibitishwa na Gazeti la New York Times kutoka vyanzo vya Marekani na Iran. Kulingana na azeti la New York Times, mtu wa karibu wa utawala wa Marekani ni Abbas Araghchi, Waziri wa Mambo ya Nje wa Iran.
Steve Witkoff, mjumbe wa Ikulu ya White House, ameripotiwa kuwasiliana naye moja kwa moja katika siku za hivi karibuni, lakini katika hatua isiyo ya juu sana kuliko kile Donald Trump anachotangaza hadharani. Huu, kwa sasa, ni mwanzo wa mazungumzo yanayowezekana.
Tehran inataka amani ya kudumu
Iran haitaki kusitisha mapigano kwa muda. Kulingana na Gazeti la New York Times, utawala wa Iran unahitaji amani ya kudumu na, zaidi ya yote, dhamana kwamba ikiwa mzozo utaisha, Marekani na Israel hazitaendelea tena na kampeni zao za mashambulizi. Hili linaweza kuonekana kuwa la kipuuzi kutokana na sauti ya hotuba ya Waziri Mkuu wa Israel Benjamin Netanyahu, lakini Tehran ina hoja zake: bado inaweza kudumisha shinikizo kwenye Mlango-Bahari wa Hormuz, na uwezo wake wa kushambulia Israel na mataifa ya Ghuba haujaharibiwa licha ya zaidi ya wiki tatu za mashambulizi makali ya anga.
Iran imeonyesha kuwa inaweza kuhimili vipigo, na Donald Trump atalazimika kutoa uhakikisho thabiti, haswa kwamba mazungumzo na Ikulu ya White House bado yanawezekana na kwamba rais wa Marekani hatarudia hali ya Februari 28, alipoanzisha vita pamoja na Israel wakati mazungumzo na utawala wa Iran bado yalikuwa yakiendelea huko Geneva.