Licha ya maendeleo makubwa katika chanjo barani Afrika, mamilioni ya watoto bado wananyimwa chanjo. Hii ni moja ya matokeo ya ripoti iliyochapishwa jana na Shirika la Afya Duniani (WHO).
Imechapishwa:
Dakika 2 Wakati wa kusoma
Matangazo ya kibiashara
Hati hiyo yenye kichwa cha habari “Towards Immunization Agenda 2030 targets”(“Kuelekea Malengo ya Ajenda ya Chanjo ya mwaka 2030”), inaangazia mafanikio makubwa: Maisha ya watu milioni 1.9 yaliokolewa mnamo mwaka 2024 kutokana na chanjo, virusi vya Wild Poliovirus vilitoweka mwaka 2020, na zaidi ya watoto bilioni moja wamechanjwa tangu mwaka 2000. Lakini ukosefu wa usawa mkubwa unaendelea.
Wild Poliovirus ni ugonjwa hatari na unaambukiza sana unaosababishwa na virusi vinavyoshambulia mfumo wa neva na vinaweza kusababisha kupooza kabisa (paralysis) ndani ya saa chache
Watoto wanaoitwa “dozi sifuri” ni wale ambao hawajapata chanjo yoyote. Mara nyingi hujikita katika maeneo dhaifu, magumu kufikiwa au maeneo yaliyoathiriwa na migogoro. Hali yao haionyeshi tu ukosefu wa upatikanaji wa chanjo, bali pia udhaifu wa mifumo ya afya.
Kwa WHO, kuwatambua watoto hawa ni kipaumbele, anaelezea Dkt. Benido Impouma, Mkurugenzi wa Kuzuia na Kudhibiti Magonjwa katika shirika hilo: “Kinachobaki kufanywa ni uwezo wa kuwatambua watoto hawa ambao hawajachanjwa. WHO inafanya kazi kuhakikisha kwamba tunaweza kuwatambua ili kupunguza idadi yao. Suala la watoto ambao hawajachanjwa halihusiani tu na chanjo; pia ni suala la mifumo ya afya, ambayo lazima iwe imara vya kutosha kuwafikia watoto ambao sio lazima wapate huduma za afya.” “
Kuimarisha uwezo wa ndani
Mbali na chanjo, WHO inatoa wito wa kuimarisha uwezo wa ndani na kupunguza utegemezi wa ufadhili wa nje, hatua muhimu kuelekea uhuru wa kweli wa afya, kama ilivyoelezwa na Mkurugenzi wa WHO katika Afrika, Mohamed Janabi: “Katika Jamhuri ya Kidemokrasia ya Kongo, tulidhibiti janga la Ebola katika miezi mitatu kwa kufanya kazi na timu ambazo tayari ziko nchini humo. Tulitumia mbinu hiyo hiyo kudhibiti virusi vya Marburg nchini Ethiopia. Pia tumefanikiwa kutokomeza surua na rubela katika nchi kama Shelisheli, Mauritius, na Cape Verde. Tunaona kujitolea kwa dhati kutoka kwa nchi wanachama kwa uzalishaji wa ndani, na kipaumbele cha juu leo ni uhuru wa afya.”
Changamoto kubwa kwa miaka ijayo: kuhakikisha upatikanaji sawa wa chanjo na kuimarisha uhuru wa afya barani Afrika, ili hakuna mtoto atakayeachwa nyuma, kulingana na malengo yaliyowekwa kwa mwaka 2030.