Dar es Salaam “Kuna tofauti kati ya mwanamke na mke.” Kauli hii imekuwa ikitajwa mara nyingi katika jamii, lakini uzito wake huonekana zaidi pale tunapoichunguza kwa undani nafasi ya mke ndani ya familia.
Mwanamke anaweza kuwa mtu wa jinsia ya kike, lakini kuwa mke ni jukumu, heshima na nafasi ya kipekee inayobeba wajibu mkubwa katika ustawi wa familia na jamii kwa ujumla.
Mke si tu mtu anayeshiriki nyumba na mwanaume wake. Yeye ni mshirika wa maisha, mlezi wa maadili, mshauri wa familia na mara nyingi huwa nguzo ya utulivu wa nyumba.
Ndiyo maana wengine humuita “jicho la tatu” la familia, kwa sababu ana uwezo wa kuona, kuhisi na kutambua mambo ambayo wakati mwingine wanafamilia wengine hawawezi kuyaona mapema.
Katika maisha ya kila siku, mke huwa daraja linalounganisha familia. Anaunganisha watoto na baba yao, anaunganisha ndugu wa pande zote mbili, na mara nyingi ndiye anayehakikisha mahusiano ya kifamilia yanaendelea kuwa imara.
Familia nyingi zinazodumu kwa mshikamano mkubwa huwa nyuma yake kuna mke mwenye hekima, uvumilivu na busara.
Mke pia ana nafasi kubwa katika malezi ya watoto.
Watoto wengi hujifunza lugha, tabia, heshima na maadili kutoka kwa mama yao. Hivyo, mke mwenye maadili mazuri hujenga kizazi bora kwa jamii.
Katika mazingira ya sasa ambapo mmomonyoko wa maadili umeongezeka, nafasi ya mke imeendelea kuwa muhimu zaidi katika kuhakikisha watoto wanalelewa katika msingi wa heshima, uwajibikaji na utu.
Aidha, mke ni mshauri mkubwa wa familia.
Mara nyingi wanaume wengi wenye mafanikio makubwa maishani wamekuwa wakikiri kuwa nyuma ya mafanikio yao kulikuwa na ushauri, moyo wa uvumilivu na msaada kutoka kwa wake zao.
Mke anaweza kuwa chanzo cha faraja wakati wa matatizo, moyo wa matumaini wakati wa kukata tamaa na nguvu ya kusimama pale familia inapopita katika changamoto.
Kwa upande mwingine, jamii inapodharau nafasi ya mke, athari zake huonekana wazi katika kuvunjika kwa familia. Leo tunaona ongezeko la migogoro ya ndoa, malezi yenye changamoto na watoto wanaokosa mwelekeo.
Sababu mojawapo ni kupungua kwa kuthamini nafasi ya mke kama nguzo muhimu ya familia. Wakati mwingine watu huangalia zaidi sura au mahitaji ya muda mfupi, lakini husahau kuwa mke ni zaidi ya uzuri wa nje; ni mfumo mzima wa maisha ya familia.
Hata hivyo, kuwa mke si jukumu rahisi. Inahitaji moyo wa uvumilivu, kujitoa, hekima na uwezo wa kusimamia changamoto mbalimbali za kifamilia.
Mke hubeba maumivu ya familia kimya kimya mara nyingi bila kutambuliwa. Anaweza kuwa ndiye anayelia kwa ajili ya watoto wake, anayefikiria mustakabali wa nyumba na anayejitahidi kuhakikisha kila mmoja ndani ya familia anakuwa salama na mwenye furaha.
Ni muhimu pia kutambua kuwa thamani ya mke haipaswi kupimwa kwa uwezo wa kupika, kuzaa au kufanya kazi za nyumbani pekee.
Katika dunia ya sasa, wake wengi wamekuwa washiriki wakubwa wa maendeleo ya kiuchumi ya familia. Wanafanya kazi, wanaendesha biashara na kuchangia kwa kiasi kikubwa ustawi wa nyumba zao.
Hivyo, nafasi yao inahitaji kuheshimiwa na kuthaminiwa zaidi.
Mwanamke ni jinsia, lakini mke ni nafasi yenye wajibu mkubwa katika kujenga familia na jamii. Mke ni daraja la upendo, mshauri wa maisha na jicho la tatu la familia. Bila yeye, familia nyingi zingepoteza mwelekeo, utulivu na mshikamano wake.
Jamii inapaswa kuendelea kuthamini nafasi ya mke na kuhimiza ndoa zinazojengwa katika msingi wa heshima, ushirikiano na upendo wa kweli. Kwa kufanya hivyo, tutajenga familia imara, na familia imara ndiyo msingi wa taifa imara