Machozi Yamwagika! Wimbo wa Mwanafunzi wa Utumishi Katika Ibada ya Mazishi ya Wenzao Wawaliza Wengi

• Ibada ya mazishi ilifanyika katika Uwanja wa Gilgil kwa heshima ya wanafunzi wa Utumishi Girls Academy waliofariki dunia katika moto wa bweni
• Hali ya huzuni ilitanda uwanjani huku wazazi waliovunjika moyo wakilia walipokuwa wakitoa salamu zao za mwisho kwa mabinti wao wapendwa
• Mwanafunzi mmoja, Cynthia Wanja, aliwaacha waombolezaji wakitiririkwa machozi baada ya kuimba kwa hisia kubwa toleo lake la Wimbo wa Historia, akisimulia matukio ya kusikitisha yaliyotokea siku ya mkasa huo wa moto

Wanafunzi wenzake pia waliwapa heshima marehemu kupitia nyimbo za matumaini na faraja.

Familia, marafiki, wanafunzi wenzao na wakazi wa Nakuru walikusanyika katika Uwanja wa Gilgil kuenzi maisha ya wanafunzi 16 waliopoteza maisha katika moto wa kutisha wa bweni la Utumishi Girls Academy.

Wingu zito la huzuni lilitanda katika uwanja huo huku waombolezaji wakisafiri kutoka maeneo mbalimbali ya nchi kuja kuwaaga wasichana hao wadogo.

Ibada hiyo ya kuaga ilifanyika Ijumaa, Juni 12, na kuongozwa na viongozi mbalimbali wa kidini.

Pia soma

Utumishi Girls’: Wazazi wa wanafunzi waliofariki wamwaga machzi katika misa ya marehemu

Mpango wa shughuli ulipoanza, wazazi wengi walishindwa kujizuia na kulia walipoona majeneza madogo yaliyobeba miili ya watoto wao waliowapenda.

Mwanafunzi Awaliza Waombolezaji kwa Heshima ya Kugusa Hisia

Wakati wa kugusa hisia ulijiri pale mwanafunzi mmoja aliyetambulika kama Cynthia Wanja alipoalikwa jukwaani kutoa heshima kwa wanafunzi wenzake waliopoteza maisha.

Msichana huyo aliimba toleo lake la wimbo maarufu wa Wimbo wa Historia, sauti yake ikiwa imejaa huzuni na majonzi.

Kupitia wimbo huo, alisimulia matukio ya siku hiyo ya mkasa, akielezea kilichotokea na jinsi wanafunzi wengi walivyojitahidi kwa udi na uvumba kuokoa maisha yao.

Pia alizungumzia majonzi yaliyolikumba taifa pamoja na uchungu mkubwa unaopitiwa na wazazi na walezi wa wanafunzi waliofariki katika moto huo.

Waombolezaji wengi waliguswa sana na heshima hiyo ya kutoka moyoni, huku baadhi yao wakionekana wakifuta machozi wakati akiimba.

Wanafunzi kadhaa waliohudhuria ibada hiyo ya kuaga pia walipewa nafasi ya kuwaenzi wenzao waliotangulia mbele ya haki.

“Tulipitia tukio la kusikitisha sana. Tunaumia, lakini bado tunaendelea kuwa imara. Tunamshukuru Mungu, na tunajua kwamba tutatimiza yote aliyotupangia,” alisema mmoja wa wanafunzi kabla ya kuwaalika wenzake kuimba wimbo.

Pia soma

“Alisaidia Kidogo”: Baba Aliyepoteza Mtoto Wake Utumishi Girls’ Amfedhehesha Sonko

Baadaye wanafunzi hao waliimba kwa pamoja wimbo wa Ni Salama Rohoni, wimbo wenye ujumbe wa matumaini, faraja na imani kwa wale wanaopitia nyakati ngumu.

Sauti zao zilizokuwa zikitetemeka kwa hisia ziligusa wengi waliokuwa wamekusanyika chini ya mahema na kuongeza hali ya huzuni iliyotanda katika ibada hiyo ya kumbukumbu.

Wakenya Waomboleza Wanafunzi wa Utumishi Girls

Polycap Pinto: “Jeneza zito zaidi kubeba.”

Otieno Faith: “Washukiwa waletwe hapa waone mavuno yao. Waone matokeo ya kitendo chao cha kishetani. Pumzikeni kwa amani roho changa.”

Deby Jones Deyietz: “Msichana huyu amenifanya nilie bila kujizuia kabisa, eiii.”

Mary Atieno: “Kuna mambo ambayo ni magumu sana kuelewa. Mungu chukua usukani.”

Waziri wa Elimu Avunja Bodi ya Utumishi Girls Academy

Katika habari nyingine, TUKO.co.ke iliripoti kuwa Bodi ya Usimamizi ya Utumishi Girls Academy ilivunjwa kufuatia moto huo mbaya wa bweni uliosababisha vifo vya wanafunzi 16.

Waziri wa Elimu, Julius Ogamba, alisema hatua za kinidhamu zitachukuliwa dhidi ya mkuu wa shule pamoja na walimu kutokana na madai ya uzembe na kushindwa kufuata masharti ya usalama na uendeshaji.

Aidha, serikali iliahidi kuhakikisha kuwa uwajibikaji unatekelezwa na haki inapatikana kwa wanafunzi waliofariki dunia katika mkasa huo.

Pia soma

Utumishi Girl’s: Mmoja wa wasichana walioangamia katika mkasa wa moto azikwa Kwale

Read ENGLISH VERSION

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia news@tuko.co.ke au WhatsApp: 0732482690.

Chanzo: TUKO.co.ke