Mkurugenzi Mkuu wa Mamlaka ya Usimamizi wa Bandari Tanzania (TPA), Plasduce Mbossa, ametunukiwa Cheti cha Heshima kwa usimamizi wake mahiri, ikiwa ni kutambua na kuthamini mchango wake mkubwa pamoja na utoaji wa huduma wa kipekee kwa jumuiya ya kimataifa ya forodha, katika maadhimisho ya Siku ya Kimataifa ya Forodha 2026.
Cheti hicho kimetolewa na Shirika la Forodha Duniani (WCO) kwa niaba ya Mamlaka ya Mapato Tanzania (TRA), katika maadhimisho yaliyofanyika jana, Januari 26, 2026, jijini Dar es Salaam, chini ya kaulimbiu isemayo: “Forodha inalinda jamii kupitia umakini na uwajibikaji.”
Tuzo hiyo ya heshima imetolewa kwa kutambua huduma ya kipekee inayotolewa na TPA chini ya uongozi wa Mbossa, pamoja na mchango wake mkubwa katika kuunga mkono na kuimarisha jumuiya ya kimataifa ya forodha, hususan kupitia uboreshaji wa mifumo, taratibu na ushirikiano wa kitaasisi.
Maadhimisho ya Siku ya Kimataifa ya Forodha 2026 yalilenga kutambua na kuenzi mchango wa sekta ya forodha katika kukuza biashara halali, kulinda uchumi wa taifa, kuongeza makusanyo ya mapato ya serikali, pamoja na kuimarisha uwajibikaji na ushirikiano kati ya TRA na wadau wake wakuu, wakiwemo taasisi zinazosimamia bandari na biashara ya kimataifa.
Akizungumza kabla ya kukabidhi cheti hicho, Kamishna Mkuu wa TRA, Yusuph Mwenda, aliipongeza TPA kwa ushirikiano wake wa karibu na wa muda mrefu na TRA, akisema umesaidia kwa kiasi kikubwa kuboresha ufanisi wa shughuli za forodha bandarini, kurahisisha biashara na kuimarisha udhibiti wa mapato ya serikali.
Mwenda alisema kuwa TPA imeendelea kuwa mdau muhimu na mfano wa kuigwa kwa kuzingatia misingi ya weledi, uwajibikaji na uadilifu, huku ikiendelea kushirikiana kwa karibu na TRA katika utekelezaji wa maboresho ya mifumo na taratibu za forodha kwa manufaa ya taifa.
Kwa upande wake, Mkurugenzi Mkuu wa TPA, Plasduce Mkeli Mbossa, aliishukuru TRA na Utawala wa Forodha wa Tanzania kwa kutambua mchango wake binafsi pamoja na wa taasisi ya TPA kwa ujumla, na kuahidi kuendelea kuimarisha ushirikiano uliopo ili kuongeza ufanisi wa bandari na kuchangia zaidi katika ukuaji wa uchumi wa nchi.
Mbossa alisema tuzo hiyo ni chachu kwa TPA kuendelea kuboresha huduma zake, kuimarisha matumizi ya teknolojia ya kisasa, pamoja na kudumisha misingi ya uwajibikaji, uwazi na uadilifu katika utoaji wa huduma za bandari na forodha.
Maadhimisho ya Siku ya Kimataifa ya Forodha yameendelea kuwa jukwaa muhimu la kutathmini mafanikio ya sekta ya forodha, kuimarisha mahusiano na wadau wa biashara, pamoja na kuweka mwelekeo wa pamoja wa kuboresha mazingira ya biashara na maendeleo ya taifa kwa ujumla.