Maelfu ya waandamanaji na wagimaji wanaotoa wito wa mshikamano na Wapalestina huko Gaza wameingia mitaani nchini Italia siku ya Jumatatu. Wengine walivamia kituo kikuu cha treni cha Milan na kukabiliana vikali na polisi.
Imechapishwa:
Dakika 2 Wakati wa kusoma
Matangazo ya kibiashara
Vyama vya wafanyakazi vya Italia, vinavyowakilisha mamia ya maelfu ya watu, kuanzia walimu hadi mafundi vyuma, vimetoa wito wa kufanyika kwa mgomo mkuu wa saa 24 katika sekta za umma na binafsi, zikiwemo usafiri wa umma, treni, shule na bandari.
Mgomo huo umesababisha usumbufu kote nchini, na kucheleweshwa kwa muda mrefu kwa treni za kitaifa na usafiri mdogo wa umma katika miji mikubwa, pamoja na Roma.
Huko Milan, hali ya wasiwasi iliongezeka wakati makumi ya waandamanaji waliokuwa wamevalia nguo nyeusi na waliojihami kwa marungu walipojaribu kuvunja lango kuu la kituo cha reli ya kati, wakiwarushia polisi mabomu ya moshi, chupa, na mawe, ambao walijibu kwa kunyunyiza pilipili. Huko Bologna, polisi walitumia mizinga ya maji kutawanya umati wa waandamanaji waliokuwa wamefunga barabara kuu.
Usafirishaji wa bidhaa ulipunguzwa, na hata kuzuiwa kwa kiasi, kufuatia mgomo wa wafanyakazi katika bandari kuu za Italia za Genoa na Livorno. Zaidi ya watu 20,000 walikusanyika nje ya kituo cha reli cha kati cha Roma kupinga hali mbaya ya kibinadamu inayoendelea Gaza.
Vyama vya wafanyakazi na mashirika ya wanafunzi yalikashifu “kutowajibika kwa serikali ya Italia na Ulaya.”
“Ikiwa hatutazuia vitendo vya Israel, ikiwa hatutazuia biashara, usambazaji wa silaha, na kila kitu kingine na Israel, hatutafika popote,” alisema Walter Montagnoli, katibu wa kitaifa wa chama cha wafanyakazi cha CUB, ambaye alishiriki katika maandamano huko Milan.
Waziri Mkuu Giorgia Meloni amelaani makabiliano makali yaliyosababishwa na baadhi ya waandamanaji, na kuyataja kuwa “ya aibu.”
“Vurugu na uharibifu hazina uhusiano wowote na mshikamano na hazitabadilisha maisha ya watu wa Gaza,” ameandika kwenye mtandao wa kijamii wa X.
Serikali ya kihafidhina inayoongozwa na Meloni, mshirika wa karibu wa Israel katika Umoja wa Ulaya, hivi karibuni imeimarisha msimamo wake kuhusu sera ya Israel kutokana na kuongezeka kwa shinikizo la ndani lililosababishwa na vita hivyo. Italia, hata hivyo, si miongoni mwa nchi, ikiwa ni pamoja na Ufaransa, ambayo imetambua rasmi taifa la Palestina katika Baraza Kuu la Umoja wa Mataifa jana Jumatatu.
Kuundwa kwa taifa la Palestina huko Jerusalem Mashariki, Ukingo wa Magharibi, na Gaza kwa muda mrefu imekuwa ikizingatiwa kimataifa kuwa njia pekee ya kutatua mzozo huo, ambao ulianza zaidi ya karne moja kabla ya shambulio la Hamas la Oktoba 7, 2023, ambalo lilianzisha vita vinavyoendelea huko Gaza. Katika shambulio hilo, wanamgambo wa Hamas waliwauwa takriban watu 1,200, wengi wao wakiwa raia, na kuwateka nyara 251. Mateka 48 wamesalia Gaza, ambapo Israel inakadiria kuwa 20 bado wako hai.
Mashambulizi ya kulipiza kisasi ya Israel katika kipindi cha miezi 23 iliyopita yameua zaidi ya watu 65,100 huko Gaza, kulingana na Wizara ya Afya ya Gaza, kuharibu maeneo makubwa ya Ukanda huo, na kusababisha takriban 90% ya watu kukimbia makazi, na kusababisha janga kubwa la kibinadamu. Wataalamu wanasema kuwa Mji wa Gaza unakabiliwa na njaa.
Wizara hiyo iko chini ya usimamizi wa serikali inayoongozwa na Hamas. Mashirika ya Umoja wa Mataifa na wataalam wengi huru wanaona takwimu hizi kuwa makadirio ya kuaminika zaidi ya majeruhi wa vita. Haielezi ni raia wangapi au wapiganaji waliouawa.