Wawakilishi kutoka nchi 30 na Tume ya Umoja wa Ulaya wametoa wito wa kukomeshwa mara moja uhasama nchini Sudan, wakielezea wasiwasi mkubwa kuhusu kuendelea mashambulizi ya mauti dhidi ya raia kote nchini humo.
Taarifa ya pamoja ilisainiwa na wawakilishi kutoka nchi 24 wanachama wa Umoja wa Ulaya, pamoja na Kanada, Norway, New Zealand, Uingereza, Iceland na Uswisi, pamoja na Kamishna wa Ulaya wa Usawa, Maandalizi na Usimamizi wa Migogoro Hadja Lahbib. Ugiriki, Kroatia na Lithuania ndizo nchi pekee wanachama wa Umoja wa Ulaya ambazo hazikuwakilishwa.
Waliotia saini makubaliano hayo walionyesha “wasiwasi mkubwa” kuhusu kuendelea “mashambulizi mabaya kinyume cha sheria” dhidi ya raia na miundombinu ya raia katika majimbo ya Kordofan na Darfur nchini Sudan, na walirudia wito wao kwa Vikosi vya Usaidizi wa Haraka (RSF), Vikosi vya Jeshi la Sudan (SAF) na wanamgambo washirika wao “kusitisha uhasama mara moja.”
“Tunalaani vurugu za kuchukiza dhidi ya raia, hasa wanawake na watoto na ukiukwaji wote mkubwa wa sheria za kimataifa za kibinadamu kwa maneno makali zaidi. Ukiukwaji huu unaweza kuwa uhalifu wa kivita au uhalifu dhidi ya ubinadamu na lazima uchunguzwe haraka na bila upendeleo, huku wale waliohusika na uhalifu wa kimataifa wafikishwa mbele ya sheria,” ilisema taarifa hiyo.
Hayo yanajiri katika hali ambayo, Kamishna Mkuu wa Haki za Binadamu wa Umoja wa Mataifa amesema kwamba uhalifu unaofanywa na wapiganaji wa kundi la Rapid Support Forces (RSF) huko El Fasher nchini Sudan ni sawa na uhalifu wa kivita na uhalifu dhidi ya ubinadamu.