Kufuatia kuongezeka mashinikizo ya kimataifa kwa serikali na taasisi za Ulaya ili kutoa jibu kali kwa jinai za utawala wa Kizayuni dhidi ya wakazi wa Ukanda wa Gaza, Shirikisho la Soka Barani Ulaya (UEFA) wiki ijayo litakuwa na kikao kujadili suala la kuziweka kando timu zote za kandanda za Israel katika mashindano ya kitaifa na vilabu ya UEFA.
Gazeti la Times la London limetangaza kuwa Shirikisho la Soka Barani Ulaya (UEFA) wiki ijayo litakuwa na mkutano ambalo lengo lake ni kuchukua uamuzi kuhusu kushiriki wawakilishi wa soka wa Israel katika michuano ya kimataifa barani Ulaya. Kwa mujibu wa ripoti hiyo, akthari ya wajumbe wa kamati ya utekelezaji ya UEFA wamesema kuwa wawakilishi wa utawala wa Kizayuni wanastahili kuondolewa katika muchuano hiyo ya barani Ulaya kutokana na mauaji ya kimbari yanayoendelea kutekelezwa na utawala huo katika Ukanda wa Gaza.
Bila kujali matokeo ya mkutano wa wiki ijayo wa UEFA kuhusu timu za kandanda za Israel; swali hili linaulizwa kwamba michezo ina nafasi ipi katika kuwaadhibu wavamizi, na kwa nini kuwekwa kando timu za kandanda za Israel katika michuano ya UEFA kuna umuhimu?
Tukitupia jicho jibu au mjibizo uliotolewa na jamii ya wanamichezo kwa jinai za utawala wa Kizayuni dhdi ya Wapalestina wakazi wa Ukanda wa Gaza tunaona kuwa fikra za waliowengi dunia zinaamini kuwa mashindano ya michezo ni fursa inayoweza kutumiwa na nchi mbalimbali kulaani jinai za Israel. Kuhusiana na hili, wakati wa mashindano ya mbio za baiskeli za Vuelta 2025 nchini Uhispania, maelfu ya watu walikusanyika kando ya njia na barabara ambako mashindano hayoyaikuwa yakifanyikia, wakiwa na mabango, kuimba nyimbo dhidi ya Israel na kutaka kusitishwa kimya cha jami ya kimataifa na viongozi wa dunia mkabala wa vita na mauaji ya kimbari ya Israel dhidi ya Gaza. Mashabiki wa timu kama Osasuna, Rio Vulcano, na Bilbao nchini Uhispania walipeperusha bendera za Palestina katika viwanja vya michezo na kuimba nyimbo za kupinga jinai na mauaji ya kimbari ya Israel katika Ukanda wa Gaza. Huko Ubelgiji, Scotland, Norway na hata Marekani pia mashabiki wamekuwa wakidhihirisha uungaji mkono wao mkubwa kwa watu wa Gaza na wakati huo huo kudhihirisha ghadhabu zao kwa utawala wa Kizayuni.
Mbali na hili, taasisi za michezo pia zimebainisha daghadagha na wasiwasi wao kuhusu jinai za utawala wa Kizayuni na hata kusema kuwa kudhihirisha radiamali ni dharura ya kimaadili. Nchini Italia Chama cha Makocha wa Soka, kwa makubaliano kamili ya wanachama wake, kiliandika barua kwa Shirikisho la Taifa la Mpira wa Miguu kikizitaka rasmi UEFA na FIFA ziisimamishe Israel katika mashindano ya kimataifa. Renzo Olivieri, Rais wa chama hicho ameitaja hatua hiyo kuwa “dharura ya kimaadili” na kusisitiza kuwa thamani za kibinadamu na kimichezo haziruhusu kunyamazia kimya dhulma na ukandamizaji. Shirikisho la Sola la Norway pia limetangaza kuwa mapato yote yatakayopatikana katika mechi dhidi ya timu ya Israel yatatengwa kwa ajili ya wahanga wa Palestina.
Kwa msingi huo, uga wa michezo katika nchi mbalimbali na katika mashindano tofauti yakiwemo mashindano ya kimataifa umekuwa uwanja wa wananchi kubainisha maoni na mitazamo yao ili kukabiiana na jinai za utawala huo unaoikalia Quds kwa mabavu. Suala hili litachunguzwa wiki ijayo katika kikao cha UEFA.
Nukta nyingine ni hii kuwa uamuzi wa Shirikisho la Soka Barani Ulaya (UEFA) wa kuiweka kando Israel katika michuano ya michezo unaweza pia kuwa chachu ya kushadidisha mashinikizo dhidi ya Israel. Baada ya kuanza vita vya Russia na Ukraine; nchi za Ulaya na baadhi ya taasisi za michezo duniani zikiwemo UEFA na FIFA ziliipiga marufuku Russia kushirki katika michuano mbalimbali ya kimataifa ikiwemo mashindano ya soka; marufuku ambayo inaendelea hadi sasa. FIFA na UEFA ziliichukulia Russia hatua hiyo katiak kile ilichokitaja kuwa kupinga vita kati yake na Ukraine na kwa ajili ya kushadidisha mashinikizo dhidi ya Moscow. Katika Mashindano ya Dunia ya Mieleka yaliyofanyika hivi karibuni huko Croatia wanamieleka wa Russia waliizuiwa kushiriki katika mashindano hayo wakiwa na bendera ya Russia.
Sababu nyingine muhimu pia ni hii kuwa, hatua zinazoweza kuchukuliwa na UEFA zinaweza kuathiri mashindano mengine ya dunia, na hata kama baadhi ya taasisi zitajizuia kuichukulia hatua Israel lakini zitakuwa chini ya mashinikizo ya fikra za waliowengi duniani.