Jeshi la Marekani limefanya mashambulizi mapya ya anga kusini mwa Iran, afisa mmoja wa Marekani amesema. Walinzi wa Mapinduzi wa Iran wametangaza leo Alhamisi, Mei 28, kwamba wamelenga kambi ya Marekani, bila kutaja ni ipi. Mapigano haya ni makubwa zaidi tangu kuanza kwa usitishaji mapigano. Wakati huo huo, Rais wa Marekani Donald Trump amekanusha ripoti za Iran Jumatano, Mei 27, kuhusu rasimu ya makubaliano ambayo yangeipa Tehran udhibiti wa Mlango-Bahari wa Hormuz.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Mambo muhimu ya kuzingatia
► Jeshi la Marekani limefanya mashambulizi mapya ya anga kusini mwa Iran usiku wa Jumatano, Mei 27, kuamkia Alhamisi, Mei 28, afisa mmoja wa Marekani ameliambia shirika la habari la REUTERS. Jeshi la Marekani limedungua ndege nne zisizo na rubani za Iran na kugonga kituo cha udhibiti katika bandari ya Bandar Abbas, ambapo ndege ya tano isiyo na rubani ilikuwa karibu kuzinduliwa.
► Kwa kulipiza kisasi, Walinzi wa Mapinduzi wa Iran wametangaza leo Alhamisi, Mei 28, kwamba wamelenga kambi ya Marekani. Hawakubainisha ni ipi, lakini jeshi la Kuwait limetangaza leo Alhamisi kwamba linakabiliwa na “mashambulizi yanayofanywa na makombora na ndege zisizo na rubani.”
► Rais wa Marekani Donald Trump amekanusha ripoti za Iran Jumatano, Mei 27, kuhusu makubaliano yaliyopendekezwa ambayo yangeipa Tehran udhibiti wa Mlango-Bahari wa Hormuz. Trump alisema kuwa hakuna nchi itakayodhibiti mlango-bahari huo, akionekana kutishia Oman, ambayo Marekani ina uhusiano wa kijeshi na kiuchumi wa muda mrefu nayo.
► Jeshi la Israel limetangaza leo Alhamisi, Mei 28, kwamba limeshambulia jiji la Tyre, kusini mwa Lebanon, siku moja baada ya kuonya kwamba linalichukulia eneo lote la Lebanon kusini mwa Mto Zahrani, kama kilomita arobaini kutoka mpakani, kuwa “eneo la mapigano”.