Ukweli wa Kuduwaza Kuhusu Mishahara ya Wajakazi wa Afrika na Wale wa Mashariki ya Kati

Kenya hivi karibuni imeongeza kiwango cha mshahara kwa wafanyakazi wa nyumbani hadi KSh 18,047 kwa mwezi.

Hatua hiyo iliibua gumzo kuhusu kiasi hicho baadhi ya watu wakihisi ni cha juu mno. Hata hivyo, unapokilinganisha na kile wafanyakazi wa nyumbani wanacholipwa katika nchi nyingine, tofauti inakuwa wazi sana na ya kusikitisha.

Uganda: Bado Inaishi katika enzi za zamani

Nchini Uganda, wafanyakazi wa nyumbani wako katika hali ngumu sana. Kiwango cha chini cha mshahara kimebaki shilingi 6,000 za Uganda kwa mwezi tangu mwaka 1984 na hakijawahi kusasishwa. Hii ni chini ya KSh 200 kwa sasa.

Pendekezo la mwaka 2019 la kuongeza hadi shilingi 136,000 za Uganda lilishindikana baada ya rais kutosaini mchakato huo. Kwa uhalisia, wafanyakazi wengi hulipwa kati ya shilingi 4,000 na 10,000 kwa mwezi, ambayo ni takribani KSh 130 hadi KSh 330.

Hii inaonyesha kuwa mshahara mpya wa Kenya ni zaidi ya mara 50 ya ule wa Uganda.

Pia soma

Taifa la Ghuba lapiga marufuku kuajiri wafanyakazi wa ndani kutoka Kenya, nchi nyingine 25 za Afrika

Tanzania: Bora Kidogo lakini Bado Chini

Nchini Tanzania, wafanyakazi wa nyumbani wanapata kidogo zaidi. Kiwango cha chini cha mshahara ni takribani TZS 140,000 kwa mwezi, ambayo ni karibu KSh 5,400.

Hii bado iko chini sana ukilinganisha na kiwango kipya cha Kenya. Mwaka 2025, rais aliongeza mshahara wa chini katika sekta ya umma, lakini wafanyakazi wa nyumbani wa sekta binafsi hawakupata ongezeko hilo.

Afrika Kusini: Juu Zaidi lakini Mara Nyingi Haitekelezwi

Afrika Kusini ina sheria kali zaidi za kazi. Wafanyakazi wa nyumbani wamo katika kiwango cha chini cha kitaifa cha takribani R30.23 kwa saa.

Kama mtu akifanya kazi saa 45 kwa wiki, hii ni takribani R5,894 kwa mwezi (karibu KSh 87,000). Hata hivyo, wafanyakazi wengi hawapati kiasi hicho.

Kwa uhalisia, wastani wa mshahara ni takribani R2,350 kwa mwezi, ambayo ni chini ya nusu ya kiwango cha kisheria. Hii inaonyesha kwamba kuwa na sheria pekee haitoshi ikiwa haitatekelezwa.

Mashariki ya Kati: Malipo Makubwa lakini Hali Ngumu

Pia soma

Je, KSh 18,000 Ni Haki au Dhihaka? Ukweli Mzito Kuhusu Maisha ya Wajakazi Kenya

Wafanyakazi wengi wa nyumbani Wakenya huenda Mashariki ya Kati kwa sababu mishahara ni mikubwa zaidi.

Wanaweza kulipwa takribani USD 213 hadi USD 545 kwa mwezi kulingana na nchi. Dubai inaweza kufikia zaidi ya KSh 70,000 kwa mwezi.

Hata hivyo, wafanyakazi wengi hulalammika kuhusu mateso na hali zisizo salama, ikiwemo saa nyingi za kazi, unyanyasaji, na hata kunyang’anywa hati. Baadhi ya ripoti pia zinaonyesha vifo vya Wakenya katika eneo hilo.

Kenya Inasimama Wapi

Mshahara wa Kenya wa KSh 18,047 uko juu kuliko Uganda na Tanzania, lakini uko chini sana ukilinganisha na Afrika Kusini na Mashariki ya Kati kwa upande wa malipo.

Suala kubwa si mshahara pekee, bali kama waajiri watafuata sheria. Wale wasiolipa kiwango hicho wanaweza kutozwa faini au kufungwa jela, lakini bado haijulikani kama sheria hizi zitatekelezwa kikamilifu.

Kwa kumalizia, wafanyakazi wengi wa nyumbani huondoka Kenya kwa sababu wanaweza kuchuma hela nyingi zaidi nje ya nchi, hasa Mashariki ya Kati.

Hali hii inaweza kuendelea isipokuwa mishahara ya ndani iongezwe na mazingira ya kazi yaboreshewe na kuhakikisha utekelezaji wake.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia news@tuko.co.ke au WhatsApp: 0732482690.

Chanzo: TUKO.co.ke