Njombe. Taasisi za fedha nchini zimetakiwa kupunguza masharti magumu yanayodaiwa kuchangia kwa kiasi kikubwa wakulima kushindwa kupata mikopo na hivyo kudhoofisha ukuaji wa kilimo nchini.
Hayo yamesemwa leo Oktoba 3, 2025 na Mkuu wa Wilaya ya Njombe, Juma Sweda kwa niaba ya Mkuu wa Mkoa wa Njombe, Anthony Mtaka, kwenye mkutano maalumu wa taasisi ya kusaidia wakulima, Private Agricultural Sector Support (PASS) na taasisi za fedha nyanda za juu kusini, uliofanyika mkoani Njombe.
Amesema taasisi za fedha zinatakiwa kubadilika kwani zinachangia kuchelewesha maendeleo kwenye kilimo, hasa katika kuongeza thamani ya mazao.
Amesema pamoja na kutumia fursa ya mkutano huo kujenga ushirikiano kati ya PASS na taasisi za kifedha ili kurahisisha upatikanaji wa mikopo, bado wanahitaji kuaminiana baina ya pande mbili ili kukuza kilimo nchini.
Amesema tofauti na nchi zingine ambazo zimekuwa zikiwapa wakulima kipaumbele kwenye utoaji wa mikopo, kwa Tanzania wakulima wamekuwa wakikutana na changamoto kubwa pindi wanapohitaji mikopo kwa ajili ya kilimo.
Amesema taasisi za fedha zinatakiwa kuwa wawezeshaji ili kuwasaidia wakulima kupiga hatua katika kilimo na si kuwa kikwazo na kurudisha nyuma maendeleo ya kilimo na wakulima kwa ujumla.
Amesema maofisa wa benki wanatakiwa kuwa mabalozi na kukumbatia dhana mpya na mifumo bunifu na fikra za mnyororo wa thamani, ili kufanya huduma za kifedha kuwa jumuishi na zenye kujibu mahitaji ya wadau.
Mkurugenzi wa Maendeleo ya Biashara kutoka PASS, Adam Kamanda amesema taasisi hiyo ina mpango wa kuboresha ushirikiano mazuri na taasisi za fedha, ili kusaidia maendeleo ya kilimo hapa nchini.
Amesema wanajadiliana namna nzuri ya kutoa mikopo ya kilimo ili kusaidia maendeleo ya kilimo na kuwezesha agenda ya Serikali katika utoaji wa mitaji na kuwasaidia wakulima.
“Sisi na taasisi za fedha tunapojadiliana tutaongeza uwezeshaji mkubwa wa miundombinu yote ya kilimo, ili kutomkwamisha mkulima katika kufikia ndoto zake,” amesema .
Mmoja wa maofisa wa benki walioshiriki mkutano huo, Lameck Haule amesema wakulima wengi wanashindwa kukopesheka kutokana na kutokuwa na dhamana ya uhakika ikiwemo hatimiliki za mashamba yao.
“Mmoja ya kigezo ambacho wakulima wetu wanapungukiwa ni kigezo cha security sasa ili kumsaidia mkulima tunashirikiana na PASS ili mkulima aweze kupata dhamana ya kupata mkopo,” amesema Haule.
Naye, mmoja ya wakulima mkoani Njombe, Monica Mesaye ameishukuru PASS kwa kushirikiana na taasisi za fedha katika kuhakikisha wakulima wanapata mikopo na kilimo chao kinakuwa na wao kupata tija.