Babati. Wagombea ubunge wa Chama Cha Mapinduzi (CCM) kutoka Mkoa wa Manyara wametoa ombi kwa mgombea urais wa chama hicho, Samia Suluhu Hassan, kuhakikisha kuwa miundombinu ya barabara inaboreshwa endapo atachaguliwa kuongoza nchi.
Wagombea hao wamesema kuwa changamoto ya barabara duni imekuwa kikwazo kwa maendeleo ya wananchi wa Manyara na hivyo kuiomba Serikali ijayo kulipa kipaumbele suala hilo.
Wagombea hao wametoa maombi yao katika mkutano wa kampeni uliofanyika Oktoba 4, 2025 mjini Babati, wakieleza kuwa hali ya barabara duni imekuwa kikwazo kikubwa kwa maendeleo ya kijamii na kiuchumi katika mkoa huo.
Mgombea ubunge wa Jimbo la Simanjiro, James Ole Millya, ametoa wito kwa Serikali ijayo kujenga barabara ya kilomita 120 kutoka mji mdogo wa Mirerani hadi Orkesumet, makao makuu ya Wilaya ya Simanjiro.
Aidha, Ole Millya amesisitiza umuhimu wa ujenzi wa barabara ya lami kutoka eneo la Oljoro namba tano hadi Orkesumet, akisema kuwa miundombinu hiyo ni muhimu kwa kuunganisha wakazi na huduma muhimu pamoja na kuchochea maendeleo ya kiuchumi katika wilaya hiyo.
“Tunatarajia barabara hizo zitajengwa kwa kiwango cha lami kwani zipo kwenye ilani na wanaompinga Samia hawafahamu Tanzania imetoka wapi, ipo wapi na inakwenda wapi?” amehoji Ole Millya.
Mgombea ubunge wa Kiteto, Edward Ole Lekaita ametoa ombi la ujenzi wa barabara ya Kongwa – Kiteto hadi Simanjiro kwa kiwango cha lami.
Ole Lekaita ametoa ombi pia la ujenzi wa barabara inayotoka Wilaya ya Kilindi mkoani Tanga, inayopita Kiteto, Kondoa mkoani Dodoma hadi mkoani Singida.
“Barabara hizo zitafungua wilaya yetu ya Kiteto kiuchumi kupitia kilimo na mifugo pia itasaidia kupitisha mizigo inayotoka bandari ya Tanga na bomba la mafuta,” amesema Ole Lekaita.
Mgombea ubunge wa Mbulu vijijini, Dk Emmanuel Nuwas ametoa ombi la kujengwa Barabara ya Mbulu – Haydom hadi Lalago na vituo vipya vya mabasi vya Haydom na Dongobesh.
Mgombea ubunge wa Mbulu Mjini, Paul Zacharia Isaay ameomba ujenzi wa barabara ya kutoka Karatu mkoani Arusha, Mbulu hadi Hospitali ya Rufaa ya Haydom.
Mgombea ubunge wa Babati Mjini, Emmanuel Khambay ameiomba aongezewe barabara za lami za mji wa Babati na kutengenezewa barabara mchepuko ili kupunguza msongamano katikati ya mji.
Hata hivyo, akizungumza kwenye mkutano huo mgombea urais wa CCM, Samia amewahakikishia wakazi wa eneo hilo kujengwa kwa barabara hizo kwa kiwango cha lami kwani zipo katika ilani ya uchaguzi ya mwaka 2025/2025.