Tabora. Chama cha Mapinduzi (CCM) kimeahidi ujenzi wa kituo cha utafiti wa mbegu na kituo cha kupoza umeme, wilayani Nzega, Mkoa wa Tabora.
Aidha, kimeahidi ujenzi wa soko la kisasa katika Jimbo la Bukene na kuimarisha ushirikiano baina ya wajasiriamali, wafanyabiashara wakubwa na Mamlaka ya Mapato Tanzania (TRA).
Ahadi hizo zimetolewa leo Jumamosi, Oktoba 4, 2025 na mgombea mwenza wa urais wa CCM, Dk Emmanuel Nchimbi katika mkutano wa kampeni uliofanyikia eneo la Itobo, Jimbo la Bukene.
Amefanya mkutano huo Tabora akitokea mkoani Lindi ambako nako alinadi Ilani ya CCM ya mwaka 2025/2030 na kumwombea kura mgombea urais, Samia Suluhu Hassan, wabunge na madiwani katika uchaguzi mkuu utakaofanyika Jumatano ya Oktoba 29, 2025.
Dk Nchimbi amesema katika kuhakikisha wanaboresha sekta ya kilimo, endapo chama hicho kitachaguliwa kitajenga kituo cha utafiti wa mbegu za kilimo Nzenga.
Pia, zitajengwa skimu tisa za umwagiliaji na kuendelea kuleta mbolea na mbegu za ruzuku lengo likiwa ni kuimarisha sekta ya kilimo ikizingatiwa uchumi mkubwa wa eneo la Bukene unatokana na kilimo.
“Tunataka mahitaji yote muhimu kwa ajili ya kuimarisha uzalishaji katika eneo la kilimo yakamilike na wakulima wasipate kikwazo chochote,” amesema Dk Nchimbi huku akimtania Hussein Bashe kwamba amejipendelea kituo hicho. Bashe ni mgombea ubunge wa Nzega Mjini ambaye pia ni Waziri wa Kilimo.
Kuhusu kero ya umeme, Dk Nchimbi
amesema CCM itahakikisha kinajengwa kituo cha kupooza na kusambaza umeme Bukene ili kufikisha nishati hiyo kwenye vitongoji vyote vya jimbo hilo.
Amesema watapanua mradi wa Ziwa Victoria ili kufikisha maji safi katika maeneo yote ya jimbo hilo na kujenga vituo vipya vya afya vinne Bukene ambavyo vitakuwa na uwezo wa kufanya upasuaji wa dharura,
Mgombea mwenza huyo ameahidi
ujenzi wa barabara za lami na kufungwa taa pamoja na ujenzi wa barabara za changarawe katika jimbo hilo.
“Haya yote yatafanyika kikamilifu endapo mkitupa ridhaa Chama cha Mapinduzi kuongoza taifa hili na uwezo wa kuyafanya haya upo,” amesema.
Dk Nchimbi amesema, katika kuboresha mazingira ya wafanyabiashara:”Mkichagua Chama cha Mapinduzi, ndugu zangu tutahakikisha tunajenga hapa soko la kisasa kabisa ili tuweze kuuza bidhaa zetu na tunajua kwamba asilimia 80 ya uchumi wa hapa ni kilimo hivyo lazima na masoko yawepo.”
Eneo la elimu amesema, wakipewa ridhaa watajenga shule mpya nne za msingi, shule mpya sita za sekondari na nyumba za walimu 15.
Ametumia mkutano huo kuahidi kwamba chama hicho kitahakikisha kunakuwepo na uhusiano mzuri kati ya wajasiriamali na mamlaka ya ukusanyaji wa mapato kwamba utaratibu wa ukusanyaji uwe rafiki usio na usumbufu kwa wajasiriamali ili kukusanya mapato mengi kwa ajili ya utekelezaji wa miradi ya maendeleo.
“Hatutaki wajasiriamali au wafanyabiashara wakubwa waone kama kulipa kodi ni adhabu, tunataka ifikie sehemu mtu aje alipe tu bila kufuatwa hali inayowafanya wafanyabiashara wachukie kulipa kodi,” amesema Dk Nchimbi.
Awali, aliyewahi kuwa Katibu Mkuu wa CCM ambaye ni mratibu wa kampeni za uchaguzi huo mikoa ya Singida, Dodoma na Tabora, Dk Bashiru Ally amesema katika eneo analosimamia ushindi utakuwa ni mkubwa.
“Sina mashaka na eneo hili kwani kampeni zimefanyika na maendeleo yamefanyika hivyo kura ni za kishindo katika kanda ya kati. Kikubwa msiniangushe nikaonekana maneno matup,” amesema Dk Bashiru ambaye amewahi kuwa Katibu Mkuu Kiongozi.
Kwa upande wake, mgombea ubunge wa Bukene, John Luhende amewahimiza wananchi wa jimbo hilo kutumia fursa za miradi inayotekelezwa Tabora ikiwemo ujenzi wa bomba la mafuta na kwamba akipata ridhaa atahakikisha barabara zinajengwa kwa kiwango cha lami na zingine kwa kiwango cha changarawe ili zipitike kipindi chote cha mwaka.
“Mkinichagua nitahakikisha kwa kushirikiana na chama changu tunaletea maendeleo katika sekta zote,” amesema Luhende.
Naye Mustafa Abdala, Mkazi wa Bukene ameomba kuboreshwa kwa miundombinu ya elimu kwani watoto wanaongezeka kila siku.
“Sisi huku tuko wengi sana na tunaendelea kuongezeka, kwa hiyo shule ni nzuri sana tunakubali lakini ziongezeke na ziboreshwe,” amesema.
Zainabu Nsisha, mkazi wa Bukene amesema sera zilizonadiwa ni nzuri na hasa eneo la kuboresha sekta ya kilimo na afya kwa sababu wanawake wanapenda wakienda hospitali wapate huduma bora.
“Kilimo sisi ndio maisha yetu na kwa sababu Chama cha Mapinduzi kimeona hilo basi waendelee kuboresha lakini kwenye afya wajitahidi kweli tusilipe gharama,” amesema Zainabu.