Dar es Salaam. Mastaa Bongo ni wengi. Wako katika fani mbalimbali sanaa na michezo. Kipindi cha nyuma kila fani ilijitegemea tofauti na sasa wasanii utawakuta kwenye michezo na wanamichezo utawakuta kwenye sanaa na kote wanafanya vizuri.
Hivyo basi Mwananchi linakuchambulia baadhi ya mastaa ambao wamefanya fani zaidi ya moja, wakiwamo na wanahabari walioamua kujiongeza katika sekta hiyo na wanafanya vizuri.
Banana Zoro (muziki & tamthilia)
Msanii wa Bongo Fleva, Banana Zoro anaigiza katika tamthilia ya Huba akionekana yupo kijijini na msanii nguli wa Bongo Movies, Jacob Stephen ‘JB’, akimfundisha kuimba na anafanya vizuri na mashabiki katika mitandao wanaonekana wanapenda anachokifanya.
Msanii huyo anaonekana sambamba na Ofisa Habari wa Azam FC, Hasheem Ibwe wakiwa kijijini na JB katika tamhilia ya Huba. Pia ameingia katika anga la siasa na alijitosa kugombea Ubunge katika Jimbo la Mwanga Kilimanjaro, lakini hakupita.
Billnass, Nandy (muziki & tamthilia)
Wasanii wa Bongo Fleva ambao ni wanandoa, Billnass na Nandy wamewahi kuigiza katika tamthilia ya Huba ingawa wote kwa sasa hawaendelei nayo.
Nandy aliwahi kulizungumzia hilo: “Naangalia ratiba zangu, nikiwa na nafasi naweza nikaigiza tena.”
Dulla Makabila (singeli & tamthilia)
Sanaa iliyomtambulisha kwa Watanzania ni muziki wa singeli uliompa umaarufu ndani na nje ya nchi, lakini kwa sasa anaonekana katika tamthilia ya Hatua, ingawa ‘sini’ anayocheza inaendana na kazi yake ya muziki, kwani kuna kipande yupo studio na Steve Mweusi na Ndaro, ambao bado wanaendeleza komedi.
Dogo Janja (muziki & tamthilia)
Msanii wa Bongo Fleva, Dogo Janja pia anaigiza katika tamthilia ya Hatua na yupo katika mambo ya siasa ambapo anagombea udiwani katika kata ya Ngarenaro, Arusha.
P-Funk Majani (prodyuza & tamthilia)
Legendari wa utayarishaji wa muziki wa Bongo Fleva, Paul Matthysse a.k.a ‘P-Funk Majani yupo katika tamthilia ya Hatua ambayo yumo pia mzazi mwenzake, staa wa Bongo Movie, Kajala Masanja, anayecheza kama mke wa Salum Kikeke na wanaishi kijijini.
Salim Kikeke – (utangazaji & tamthilia)
Mtangazaji nguli wa kimataifa aliyefanya kazi katika shirika la habari la BBC Uingereza kwa miaka mingi, Salim Kikeke anaonekana katika tamthilia ya Hatua akiigiza kama mjomba wa Dulla Makabila, anacheza ‘sini’ ya kulima maparachichi ya biashara kijijini na kwenda kuuza mjini, ambako anakutana na P-Funk Majani.
Haruna Niyonzima – (soka & tamthilia)
Nyota wa soka aliyewahi kuichezea Yanga, Simba na timu ya taifa ya Rwanda, Haruna Niyonzima ‘Fabregas’, aliigiza katika tamthilia ya The Ring na pia ni muimbaji wa muziki wa hip hop.
“Filamu hiyo imebeba uhalisia wa wanaume wengi. Kama watu watapata muda wa kuifuatilia kwa umakini itawafunza na bado haijaisha, tutaendelea kuirekodi pia ninaimba muziki, naingia studio narekodi na nimewahi kufanya kolabo na mwanamuziki wa Rwanda anaitwa Jay Polly kwa lugha ya kwao,” anasema Niyonzima.
Mpenja – (utangazaji, utunzi & uigizaji)
Pamoja na umahiri wake wa kutangaza mpira wa miguu nchini, Baraka Mpenja ana kipaji kikubwa cha kuigiza na kuandika stori.
Mpenja ameandika tamthilia ya Mwaipopo iliyopata mashabiki wengi kutokana na uhusika aliokuwa ameuvaa na sasa tamthilia inayoendelea ni Definition of Love.
“Kipaji cha kuigiza kilianza tangu nasoma shule ya msingi, natunga stori, ni muongozaji na mtayarishaji wa filamu pia, nina muda mfupi sana wa kulala najaribu kupambana nikiwa kijana ili kuja kuwa bilionea kama ilivyo kwa Bakhresa,” anasema.
Lulu Diva (muziki & tamthilia)
Mwanadada Lulu ‘Diva’ Abbas amekuwa akifanya vyema kwenye muziki wa bongofleva. Ni wachache waliotarajia kumuona katika fani tofauti ya uigizaji. Aliigiza kwa kiwango cha juu akiuwasha moto katika tamthilia ya Jua Kali inayorushwa na DStv.