Dar es Salaam. Wakali wa hip-hop Bongo, AY na Fid Q wameweka wazi kuwa nyimbo zao zimekubaliwa kuingia katika mchakato wa kupata uteuzi wa kuwania tuzo za 68 za Grammy zinazotarajiwa kufanyika Februari 2026 nchini Marekani.
Endapo Recording Academy itazipitisha kuwania na mmojawapo kuibuka mshindi, basi hiyo itakuwa rekodi ya kiume kwa sababu kipengele walichojitosa hakuna mwanamuziki wa kiume aliyewahi kushinda.
Mastaa hao walioshirikiana katika ngoma kama Shimo Limetema (2009), Jipe Shavu (2013), Ujio wa Verse (2014), Upo Hapo (2017) na Microphone (2018), ndio wasanii pekee Bongo walioweka wazi kufikia hatua hiyo.
Katika mchakato huo, AY ameingiza nyimbo mbili Wanganeka (2025) akimshirikisha Kanjiba, mwingine ni Simuoni (2025) akimshirikisha Harmonize ambaye ni mwanzilishi wa Konde Music Worldwide.
“Hii ni ishara kuwa sauti yetu na lugha yetu vinaweza kusikika mbali. Ushindi huu ni wenu nyote mashabiki mliokuwa nasi kwenye safari hii,” anaeleza AY, mwanachama wa zamani wa S.O.G. na East Coast Team.
Naye Fid Q, mkali wa kibao maarufu katika Hip Hop, Mwanza (2005), wimbo wake uliopenya ni Glory 2 (2025) ambao kawashirikisha Damian Soul na Jose Chameleone kutokea Uganda. Ikumbukwe Glory 2 ni kati ya nyimbo 15 zilizopo albamu ya nne yake Fid Q, KitaaREJEX (2025) ambayo imejumuisha nyimbo zilizokosa nafasi katika albamu ya tatu, KitaaOLOJIA (2009).
“Huu siyo ushindi wangu tu – ni wetu sote. Kutoka Tanzania hadi Uganda, na hadi ulimwenguni kote. Tunaandika hii historia kwa pamoja,” anasema Fid Q, mwanzilishi wa Cheusi Dawa Entertainment.
Hatua inayofuata ni waratibu na waandaaji wa tuzo za Grammy, Recording Academy pamoja na wanachama wao kuzipitia nyimbo zote kisha kuzipigia kura zile zilizokidhi vigezo vya kupata nafasi ya uteuzi kwa msimu wa 68 hapo mwakani.
Wanachana wa Recording Academy, ni kundi la watu wenye uelewa mkubwa wa muziki wakiwemo wasanii, watunzi wa nyimbo, watayarishaji na wahandisi ambao hupita mchakato maalamu kabla ya kupata nafasi hiyo.
AY na Fid Q wameomba nyimbo zao kuwania kipengele cha Best African Music Perfomance ambacho ni maalum kwa ajili ya muziki wa Afrika, na mwakani kitaenda msimu wake wa tatu tangu kuanzishwa kwake.
Kipengele hicho kinajumuisha muziki kama Bongofleva, Afrobeat, Afro-fusion, Afro pop, Afrobeats, Alte, Amapiano, Genge, Kizomba, Chimurenga, High Life, Fuji, Kwassa, Ndombolo, Mapouka, Ghanaian Drill, Afro-house, Hip Hop, Ethio Jazz n.k.
Tangu kutambulishwa kwake mnamo Juni 2023 na kuanza kuwatunza wasanii msimu uliofuatia, yaani 2024, ni wanamuziki wa kike pekee ndio wamefanikiwa kuibuka washindi katika kipengele hicho cha Best African Music Perfomance.
Tyla kutokea Afrika Kusini alishinda 2024 kupitia wimbo wake, Water (2023) akiwabwaga mastaa kibao wa Nigeria, kitu kilichowafanya mashabiki wa nchi hiyo kulalamika sana mtandaoni wakiamini Davido alistahili kushinda.
Hivyo Tyla akaandika rekodi kama mwanamuziki wa kwanza kushinda Best African Music Perfomance akiwazidi kete Asake & Olamide (Amapiano), Burna Boy (City BoysMiracle), Davido ft. Musa Keys (Unavailable) na Ayra Starr (Rush).
Msimu wa 2025, staa wa Nigeria, Tems akashinda kupitia wimbo wake, Love Me Jeje (2024) mbele ya Asake & Wizkid (MMS), Burna Boy (Higher), Yemi Alade (Tomorrow) na Chris Brown ft. Davido & Lojay (Sensational).
Hiyo ilikuwa Grammy ya kwanza kwa Tems kushinda kupitia kazi yake binafsi, ila ya pili kwa ujumla baada ya hapo awali kushinda kupitia wimbo aliyoshirikishwa na rapa wa Marekani, Future, Wait For U (2022). Sasa kituo kinachofuata ni msimu wa 2026.
Je itakuwa ni zamu ya wasanii wa kiume nao kutamba?, kama ndiyo, ni AY, Fid Q au kuna ‘kidume’ mwingine?. Je, itakuwa ni zamu ya Tanzania baada ya Afrika Kusini na Nigeria? Muda ndio utajibu.
Kwa sehemu mastaa hao wana uzoefu na tuzo za kimataifa mathalani wote wamewahi kushinda tuzo za Channel O – Fid Q akishinda kupitia kolabo na Witness, Zero (2008), huku AY na ngoma yake I Don’t Wanna Be Alone (2012).
Ikumbukwe tuzo za Grammy ambazo ndizo zenye hadhi ya juu kabisa katika tasnia ya muziki duniani zilianza kutolewa Mei 4, 1959 wakati huo zikifahamika kama Gramophone. Lengo lake kuu ni kutambua na kusheherekea mafanikio ya tasnia ya muziki.
Mwimbaji wa zamani wa kundi la Destiny’s Child, Beyonce Knowles hadi sasa ndiye mwanamuziki aliyeshinda tuzo nyingi zaidi za Grammy duniani kwa muda wote akiwa ameshinda mara 35, huku akifuatiwa na George Solti mwenye tuzo 31.