Makundi na harakati za Palestina zimetangaza kuwa zinapinga uwepo wowote wa kijeshi wa kigeni au kambi za kimataifa ndani ya Ukanda wa Gaza, zikisisitiza kwamba suala hilo linawakilisha ukiukwaji wa moja kwa moja mamlaka ya kujitawala ya Wapalestina.
Katika taarifa iliyotolewa jioni ya jana Jumapili, harakati za kupigania uhuru za Palestina zilikosoa rasimu ya azimio iliyopendekezwa na Marekani itakayopigiwa kura leo Jumatatu katika Baraza la Usalama la Umoja wa Mataifa, zikisema ni hatari sana, kwa sababu inafungua njia ya madola ya kigeni kudhibiti maamuzi ya kitaifa ya Palestina.
Harakati hizo zimeongeza kuwa rasimu hiyo inabadilisha kile kilichopewa jina la Idara ya Ukanda wa Gaza na Ujenzi Mpya kuwa chombo cha kimataifa kisicho na mipaka, hivyo kuwanyima Wapalestina haki yao ya kusimamia mambo yao wenyewe.
Taarifa ya harakati hizo imesisitiza kuwa, rasimu iliyopendekezwa na Marekani ya kuanzisha kikosi cha kimataifa katika Ukanda wa Gaza inalenga kulazimisha usimamizi wa kimataifa katika eneo hilo la Palestina na kupitisha maamuzi yenye upendeleo.
Harakati na makundi hayo ya Palestina yamesisitiza kwamba juhudi zozote za kibinadamu lazima zisimamiwe kupitia taasisi husika za Palestina chini ya usimamizi wa Umoja wa Mataifa.
Taarifa hiyo pia imepinga kifungu chochote kinachohusiana na kupokonywa silaha harakati za mapambano za Gaza au kukiuka haki ya watu wa Palestina ya muqawama na mapambano dhidi ya adui mvamizi, ikisisitiza kwamba majadiliano yoyote kuhusu silaha lazima yabaki kuwa jambo la kitaifa linalohusiana na mchakato wa kisiasa unaohakikisha mwisho wa uvamizi wa Israel.