Harakati ya Muqawama wa Kiislamu ya Palestina (Hamas) imetangaza katika taarifa yake kwamba makundi na harakati za Palestina zimewasilisha waraka kuhusu rasimu ya azimio la Marekani katika Baraza la Usalama la Umoja wa Mataifa na kusisitiza kuwa wamepinga vikali azimio hilo lililopendekezwa na Marekani kupitia waraka huo.
Hamas imesisitiza katika taarifa hiyo kuwa makundi na harakati za Palestina zimewasilisha waraka wa kisiasa na kutahadharisha kuhusu hatari ya rasimu ya azimio la Marekani kwa ajili ya kuidhinishwa katika Baraza la Usalama; hasa kuhusu suala la kuundwa kikosi cha kimataifa katika Ukanda wa Gaza, hatua ambayo wameitaja kuwa jaribio la kutwisha mamlaka ya usimamizi wa kimataifa huko Gaza na kutekeleza hatua ya upande mmoja inayowapendelea Wazayuni maghasibu.
Baraza la Usalama la Umoja wa Mataifa leo Jumatatu lilipanga kuipigia kura rasimu ya azimio inayounga mkono mpango wa Rais Donald Trump wa Marekani kwa ajili ya Gaza. Mpango huo wa Marekani unaunga mkono kuundwa “Baraza la Amani”; ambalo litakuwa taasisi ya mpito kwa ajili ya kuisimamia Gaza. Misheni au kazi za baraza hilo ambalo litasimamiwa na Trump zitaendelea hadi mwishoni mwa mwaka 2027.
Hamas na makundi mengine ya muqawama ya Palestina yanapinga azimio lililopendekezwa na Marekani kwa sababu nchi hiyo siku zote imekuwa bega kwa bega na kuuhami utawala wa Kizayuni; na mipango yake si kwa ajili ya kuuunga mkono haki za Wapalestina bali zaidi ni kwa ajili ya kuimarisha vitendo vya ukaliaji mabavu. Ndio maana mpango wowote wa Marekani kwa ajili ya kuiongoza Gaza hauaminiki.
Taarifa ya Hamas imeeleza kuwa mjadala wowote kuhusu silaha za makundi ya muqawama ni suala la kitaifa na la ndani na halipaswi kuwa chini ya mashinikizo ya nchi ajinabi. Makundi ya mapambano ya Palestina yanasisitiza kuwa, wana haki ya kuendesha mapambano ya ukombozi na kujihami kwa sababu haki hiyo ni ya wazi na halali kwa mujibu wa sheria za kimataifa.
Rasimu iliyopendekezwa na Marekani inajumuisha uuandaji wa kikosi cha kimataifa na taasisi ya mpito kwa ajili ya kuendesha masuala ya Gaza hadi mwaka 2027. Hamas inaamini kuwa hatua hiyo ni sawa na kusimika “usimamizi wa kimataifa” ambao unadhoofisha haki ya Wapalestina ya kujitawala. Makundi ya muqawama ya Palestina yanaamini kuwa Gaza haipasi kuwa chini ya uongozi wa Marekani au taasisi zozote nyingine zenye mfungamano na Magharibi; bali ukanda huo unapasa kusimamiwa kwa kushirikisha taasisi za Palestina na katika fremu ya mfumo wa mipango ya Kiarabu na Kiislamu.
Hamas imetahadharisha kuwa mpango wa Marekani kwa hakika ni kwa maslahi ya utawala wa Kizayuni na unaweza kuugeuza mchakato wa ujenzi mpya na misaada ya kibinadamu kuwa wenzo wa mashinikizo na udhalilishaji. Mpango huu pia unaweza kudhoofisha nafasi ya taasisi kama vile UNRWA (Shirika la Misaada la Umoja wa Mataifa kwa ajili ya Wakimbizi wa Kipalestina).
Hamas aidha imetangaza kuwa, mbadala halisi wa azimio lililopendekezwa na Trump unapasa kuwa ni azimio ambalo litahahakisha kuwa usitishaji vita unaimarishwa na mashambulizi ya utawala wa Kizayuni dhidi ya Gaza, Ukingo wa Magharibi na Quds yanakomeshwa. Makundi ya muqawama ya Palestina yanaamini kuwa rasimu ya Marekani haisaidii kivyovyote kuboresha hali ya kibinadamu na kiusalama huko Gaza.
Makundi ya mapambano ya ukombozi ya Palestina yanaamini kuwa suala ya kuiongoza Gaza ni haki ya wananchi wa Palestina na yanapinga uingiliaji wowote wa nchi ajinabi katika masuala ya ukanda huo. Malengo ya Marekani na utawala wa Kizayuni katika azimio hili lililopendekezwa yameratibiwa ili kupunguza nguvu za kijeshi na kisiasa za makundi ya muqawama, kudhoofisha nafasi ya taasisi za Palestina na kushadidisha hatua za ukaliaji mabavu na kujitanua.
Upinzani wa Harakati ya Hamas na makundi ya muqawama ya Palestina kwa azimio lililopendekezwa na Marekani katika Baraza la Usalama la Umoja wa Mataifa unaweza kutolewa ufafanuzi katika fremu ya kutoaminiwa kihistoria sera za Washington na uungaji mkono wake wa wazi na wa pande zote utawala wa Kizayuni. Makundi hayo yanaamini kuwa mipango ya Marekani inaratibiwa si kwa lengo la kuunga mkono haki za wananchi wa Palestina bali ili kuimarisha hatua zakujitanua na kuyabana makundi ya mapambano ya Palestina.
Hamas na makundi mengine ya Palestina yanasisitiza kuwa kuna ulazima wa kuwasilishwa azimio jingine ambalo litatoa kipaumbele kwa usitishaji vita wa kweli, litakomesha hujuma za utawala wa Kizayuni na kudhamini haki za kitaifa za Wapalestina. Kwa msingi huo, kupinga makundi hayo ya muqawama si tu ni mjibizo wao wa kisiasa bali pia ni sehemu ya statejia kubwa zaidi kwa ajili ya kulinda uhuru wa Palestina wa kufanya maamuzi na kuzuia uingiliaji wa maajinabi katika usimamizi wa Gaza.