Kampuni moja ya utawala wa kizayuni wa Israel imefungua kiwanda chake cha kwanza nje ya nchi huko Morocco cha uundaji wa ndege zisizo na rubani za mashambulizi aina ya Spike.
Tovuti ya Israel ya Globes imeripoti kuwa, kampuni tanzu ya Israel Aerospace Industries iitwayo Blue Bird, imefungua kituo kipya cha uzalishaji katika jiji la Ben Suleiman karibu na Casablanca. Kituo hicho ni cha kwanza cha kampuni hiyo katika eneo la Mashariki ya Kati na Afrika Kaskazini.
Ndege isiyo na rubani ya Spike inabeba kichwa cha kivita chenye uzito wa kilo 2.5, inaweza kuruka kwa kasi ya hadi kilomita 250 kwa saa, na ina uwezo wa kufanya kazi kwa muda wa dakika 90.
Droni hiyo imeundwa ili kuweza kushambulia vifaru, magari ya kivita, na ngome za kijeshi. Kwa mujibu wa ripoti hiyo, jeshi la Morocco liliifanyia majaribio ndege hiyo isiyo na rubani mnamo Machi 2024. Inasemekana kuwa, ufunguzi wa kiwanda hicho kipya cha kampuni ya utawala wa kizayuni utatoa fursa kwa wahandisi wa Morocco ya kupata mafunzo ya ufungaji na utunzaji wa ndege hizo.
Tangu uliposainiwa Mkataba wa Abraham mwaka wa 2020 wa kuanzisha uhusiano rasmi na utawala haramu wa Israel, Morocco imekuwa mojawapo ya maeneo makuu ya viwanda vya kijeshi vya utawala huo wa kizayuni, na ushirikiano kati ya pande hizo mbili umepanuka kwa kiasi kikubwa katika miaka ya hivi karibuni, ambapo kwa mujibu wa tovuti ya Defense Post, ushirikiano huo umechukua nafasi ya uhusiano wa jadi wa kijeshi uliokuwepo kati ya Morocco na Ufaransa…/