Baraza la Mahakama la Jinai za Kimataifa (International Crimes Tribunal), ICT la Bangladesh leo limetoa hukumu ya adhabu ya kifo kwa Waziri Mkuu wa zamani aliyeitoroka nchi Sheikh Hasina, baada ya kumpata na hatia ya kuhusika na jinai dhidi ya binadamu-mbali na makosa mengine-, kwa uhalifu uliofanywa mwaka jana wakati wa maandamano makubwa zaidi kuwahi kutokea ya kupinga serikali yake.
Akisoma hati ya hukumu hiyo yenye kurasa 453 kwa niaba ya jopo la majaji watatu, Jaji Mkuu wa Mahakama ya Juu ya Bangladesh, Golam Mortuza Mozumder ambaye pia ni Mwenyekiti wa ICT amesema, “Hasina alikuwa ‘kamanda mkuu wa ukatili wote’ uliofanywa”, na akaongeza kuwa “uhalifu huo ulitokea yeye akiwa na ufahamu kamili’ “.
Mwanasiasa huyo mwenye umri wa miaka 78 aliyehukumiwa bila yeye mwenyewe kuwepo mahakamani ametajwa kuwa “mpangaji mkuu na mbunifu mkuu” wa ukandamizaji mkubwa wa maandamano ya umma yaliyofanyika mwaka jana, ambapo watu wapatao 1,400 waliuawa.
Machafuko ya mwaka 2024 yalimaliza utawala wa “kimabavu” wa zaidi ya miaka 15 wa Hasina katika taifa hilo la Asia Kusini uliogubikwa na madai ya kukandamiza upinzani, na kukamatwa na kuuawa watu kinyume cha sheria.
Tangu alipong’olewa madarakani, Hasina amekuwa akiishi uhamishoni nchini India alikokimbilia mnamo Agosti 5 mwaka jana wakati wa kilele cha maandamano hayo ya upinzani yaliyoongozwa na wanafunzi, na hadi sasa hajaonekana hadharani au hata mtandaoni.
Chama chake cha Awami League ambacho sasa kimepigwa marufuku kimeiita mahakama ya Dhaka kuwa ni “mahakama ya kangaroo” na kutoa wito kwa wafuasi wake kuandamana, na hivyo kuzua khofu ya kuzuka vurugu na machafuko nchini humo…/