Mfumuko wa bei na gharama ya maisha zinazidi kupanda huko Israel. Huku hali ikiwa hivyo ripoti rasmi ya Taasisi ya Bima ya Israel inaoneesha kwamba umaskini umeongezeka kwa zaidi ya theluthi moja kwa wakazi wa utawala huo baada ya Operesheni ya Kimbunga cha Al Aqsa ya Oktoba 7, 2023.
Shirika la Habari la Fars limenukuu ripoti ya hivi karibuni ya kila mwaka ya Taasisi ya Bima ya Israel ambayo ina jukumu la kupima umaskini na kulipa pensheni, ikionesha kuzidi kuwa mbaya hali ya uchumi katika ardhi za Palestina zilizopachikwa jina bandia la Israel. Ripoti hiyo inaonesha kwamba zaidi ya thuluthi moja ya watu wa Israel, wakiwemo zaidi ya watoto milioni moja, wanateseka kwa “uhaba wa chakula” na hawana uwezo wa kumudu chakula cha kutosha au chakula bora. Ripoti hiyo imechapishwa huku bei za bidhaa zikizidi kupanda hali ambayo wataalamu wanasema ni ishara ya kuzidi kuporomoka uwezo wa manunuzi wa familia za Wazayuni.
Kwa mujibu wa ripoti hiyo, kawaida huwa kunatolewa Faharisi ya Bei ya Watumiaji ambayo ni kipimo rasmi cha bei za bidhaa na huduma za kila siku. Ikiwa faharisi hiyo itapanda, huwa na maana kwamba gharama za maisha nazo zimepanda. Gharama kubwa iko kwenye masuala ya nyumba, chakula na huduma, huku sehemu kubwa ya idadi ya wakazi wa utawala wa Kizayuni wanapambana na mfumuko mbaya wa bei. Umaskini wa chakula nao huongezeka baada ya matukio ya kiusalama, wakati wa vita na kukosekana amani.
Taasisi ya Bima ya Israel imetangaza kwamba mwaka 2024 ulikuwa moja ya miaka mibaya zaidi kwa Israel na ukata wa chakula ulienea sana kwenye familia za Wazayuni hasa baada ya Operesheni ya Kimbunga cha Al-Aqsa iliyoongozwa na HAMAS tarehe 7 Oktoba, 2023 na baada ya Hizbullah ya Lebanon kuingia vitani kuwasaidia Wapalestina.