Maafisa wawili wa Kitengo cha Ulinzi wa Mpaka cha Kenya wameuawa Jumatano baada ya gari lao kukanyaga bomu la kutegwa ardhini (IED) lililowekwa na magaidi wakufurishaji wa al-Shabaab kutoka Somalia katika barabara ya Liboi kuelekea Kulan, kaskazini mwa Kenya.
Kwa mujibu wa taarifa ya Polisi ya Kenya, Shambulio hilo lilitokea karibu na mpaka wa Kenya na Somalia, katika Kaunti ya Garissa, eneo lililopo takribani kilomita 370 kaskazini mashariki mwa mji mkuu Nairobi.
Maafisa wa polisi waliwaeleza waandishi wa habari kwamba wapiganaji wa al-Shabaab walipandikiza na kulipua kifaa hicho wakati maafisa hao wakiwa kwenye doria, na kusababisha gari lao kuharibiwa kabisa na maafisa wawili kufariki papo hapo.
Vikosi vya usalama vilitumwa katika eneo hilo kuimarisha usalama, katika wakati ambapo kundi hilo la kigaidi limeendelea kulenga maafisa wa usalama na kuvuruga shughuli za ulinzi wa mpaka.
Picha kutoka eneo la tukio zinaonyesha gari la doria lililogonga bomu likiwa limepinduka na barabara ikiwa na shimo kubwa linaloaminika kuwa mahali pa mlipuko. Maafisa walionekana wakichambua mabaki hayo.
Kenya imekuwa ikikabiliwa na mashambulizi ya mara kwa mara ya magaidi wa al-Shabaab tangu ilipotuma wanajeshi wa kulinda amani Somalia mwaka 2011 chini ya ujumbe wa Umoja wa Afrika, ambao sasa ni ATMIS.
Kundi hilo la kigaidi mara nyingi hufanya mashambulizi ya kuvizia mipakani, huweka mabomu barabarani yanayolenga doria za polisi wa mpakani, pamoja na kushambulia vituo vya polisi vilivyo mbali, likilenga kuiwekea Kenya presha iondoe vikosi vyake Somalia.
Kaunti za Garissa, Mandera na Wajir ndizo zimeathiriwa zaidi, huku al-Shabaab ikitumia mianya ya mipaka, barabara duni na mazingira ya mbali kutekeleza mashambulizi.
Licha ya doria kuongezeka na ufuatiliaji kuimarishwa, mamlaka za Kenya zinasema al-Shabaab bado ni tishio , hasa kupitia mabomu ya kutegwa barabarani ambayo yamewaua makumi ya maafisa wa usalama katika kipindi cha miaka zaidi ya kumi.