Wapalestina wasiopunguua 28 wameuawa shahidi katika wimbi jipya la mashambulizi ya kinyama yanayofanywa na jeshi la utawala wa kizayuni wa Israel kwenye Ukanda wa Ghaza, yakiwa ni moja ya ukiukaji mkubwa zaidi wa makubaliano ya kusitisha mapigano yaliyosimamiwa na Marekani na kuanza kutekelezwa mwezi uliopita wa Oktoba.
Wizara ya Afya ya Palestina huko Ghaza ilitangaza jana Jumatano kwamba mbali na waliouliwa shahidi, kwa akali, Wapalestina wengine 77 walijeruhiwa katika mashambulizi hayo ya makombora na mabomu yaliyofanywa na jeshi la kizayuni katika maeneo tofauti ya ukanda huo.
Duru za habari zimeripoti kuwa mashambulizi ya Israel yalilenga maeneo matatu maalumu ikiwa ni pamoja na eneo la al-Mawasi kusini mwa Ghaza, karibu na Khan Younis.
Jeshi la utawala ghasibu wa Israel limeshambulia pia makutano katika eneo la mashariki mwa Jiji la Ghaza la Shujayea lililofurika familia za Wapalestina waliolazimika kuyahama makazi yao, pamoja na jengo moja lililoko kwenye kitongoji cha Zeitoun ambapo watu wasiopungua 10, wakiwemo wa familia nzima, waliuawa shahidi.
“Baba, mama, na watoto wao watatu waliuawa ndani ya jengo hili,” ameeleza Hani Mahmoud, ripota wa televisheni ya Aljazeera ya Qatar Mahmoud, na kuongeza kuwa mashambulizi hayo ya kinyama yanayoshtadi kila uchao yanazidisha khofu katika Ukanda wa Gaza uliowekewa mzingiro na jeshi la kizayuni.
“Tayari, Wapalestina kote Ghaza wanakabiliana na vitisho vya kila siku,” ameeleza ripota huyo na kubainisha kuwa mashambulio ya mabomu na makombora ya Israel hayajasimama tangu usitishaji mapigano kati ya utawala huo wa kizayuni na harakati ya Hamas ulipoanza kutekelezwa tarehe 10 Oktoba.
“Vita vingali vinaendelezwa, na Wapalestina wanaendelea kufa kutokana na machafuko yanayoendelezwa”, amebainsha Mahmoud.
Uchunguzi uliofanywa na Al Jazeera umegundua kuwa tangu Oktoba 10, utawala wa kizayuni wa Israel umekiuka makubaliano ya kusitisha mapigano mara zisizopungua 393…/