Mkutano wa viongozi wa G20 umefunguliwa Jumamosi mjini Johannesburg, Afrika Kusini, ambapo Rais Cyril Ramaphosa alitoa hotuba ya kwanza wakati wajumbe walipokusanyika kwa mazungumzo ya siku mbili.
Ramaphosa aliwaeleza viongozi kuwa Afrika Kusini, kupitia urais wake wa G20, imeendesha takriban mikutano 130 ndani na nje ya nchi, kwa lengo la kulinda heshima ya jukwaa hili ambalo sasa limepanuka na kujumuisha uchumi biashara, maendeleo, afya, nishati, mabadiliko ya tabianchi na changamoto nyingine za kimataifa.
Kwa mujibu wa kauli mbiu ya G20 chini ya urais wa Afrika Kusini, “Ushirikiano, Usawa na Uendelevu”, mkutano huu wa kwanza wa G20 kufanyika barani Afrika unatarajiwa kuzingatia hasa suala la msamaha wa madeni kwa nchi zenye kipato cha chini.
Rais Ramaphosa alisema mshikamano ni msingi wa kujenga mustakabali shirikishi na kuongeza kuwa, kama mwanachama mwanzilishi wa G20, Afrika Kusini imejitahidi kuhakikisha vipaumbele vya maendeleo vya Afrika na ulimwengu wa Kusini vinawekwa kama ajenda ya kudumu katika vikao vya G20 , jambo muhimu si kwa ukanda pekee bali kwa dunia nzima.
Ramaphosa alisisitiza pia kuwa utulivu huvutia uwekezaji, na uchumi unaostawi huzalisha rasilimali zinazohitajika kukabiliana na vitisho vya sasa, ikiwemo mivutano ya kisiasa, mabadiliko ya tabianchi, janga la maradhi, uhaba wa nishati na chakula, ukosefu wa usawa na ajira. Katika mkutano huo wa siku mbili, viongozi wa dunia wanatarajiwa kujadili pia mbinu za kukabiliana na mabadiliko ya tabianchi na mchakato wa kuelekea nishati safi.
Waziri wa Mambo ya Nje wa Afrika Kusini, Ronald Lamola, alisema wiki hii kuwa jumla ya nchi 42 zinatarajiwa kushiriki katika mkutano huu wa kihistoria wa G20. Hata hivyo, Marekani ,mwanachama mwanzilishi wa G20 , imeususia mkutano wa mwaka huu. Mapema mwezi huu, Rais wa Marekani Donald Trump alitangaza kuwa hatatuma afisa yeyote wa Marekani Johannesburg, akitoa madai ya “ukiukaji wa haki za binadamu” dhidi ya jamii ya Waafrika wazungu makaburu (Afrikaner) , madai ambayo serikali ya Afrika Kusini imeyakanusha mara kwa mara na kusema hayana msingi.
Mwaka huu, uhusiano kati ya Washington na Pretoria umedorora kwa kiwango cha chini zaidi kutokana na tofauti za sera za ndani na za kimataifa.
G20, iliyoanzishwa mwaka 1999, inajumuisha nchi 19 pamoja na miungano miwili ya kikanda , Umoja wa Ulaya (EU) na Umoja wa Afrika (AU).
Nchi wanachama ni Ajentina, Australia, Brazili, Kanada, China, Ufaransa, Ujerumani, India, Indonesia, Italia, Japani, Korea Kusini, Meksiko, Urusi, Saudi Arabia, Afrika Kusini, Uturuki, Uingereza, Marekani.