Bruno Rodriguez Waziri wa Mambo ya Nje wa Cuba amesema kuwa Marekani inatumia uzushi kuhalalisha operesheni zake za kijeshi dhidi ya Venezuela, kwa lengo la kuiangusha serikali ya nchi hiyo na kudhibiti rasilimali za mafuta za nchi hiyo.
Rodriguez amebainisha haya Jumanne wiki hii huku Marekani ikizidisha mashinikizo kwa Venezuela chini ya kile inachokiita kampeni ya kupinga biashara ya dawa za kulevya. Siku moja kabla ya matamshi ya Waziri wa Mambo ya Nje wa Cuba, Washington imeliorodhesha genge la wauzaji wa dawa za kulevya linalojulikana kwa jina la “Cartel de los Soles” (Cartel of the Suns) kama taasisi ya nje ya kigaidi kwa madai kuwa taasisi hiyo inahusishwa na Rais Nicolás Maduro.
Waziri wa Mambo ya Nje wa Cuba amesema kuwa Cartel of the Suns ni uzushi wa serikali ya Marekani na Waziri wake wa Mambo ya Nje, uliokusudiwa kuhalalisha vitendo vya vurugu ili kuipindua serikali ya Venezuela na kudhibiti mafuta ya taifa hilo.
Serikali ya Venezuela kwa upande wake imekanusha vikali kuwepo kwa genge hilo. Serikali ya Caracas Jumatatu wiki hii ilizitaja tuhuma za washington kuwa “uzushi wa kipuuzi” weneylengo la “kuhalalisha uingiliaji haramu dhidi ya Venezuela,”
Venezuela pia imekanusha tuhuma za Marekani kwamba inahusika na magendo yamihadaratikatika visiwa vya Caribbean, ikisisitiza kuwa imekuwa ikipambana na vitendo hivyo kwa miaka mingi.
Tangu mwezi Septemba hadi sasa, Marekani imewaua takriban watu 80 katika mashambulizi ya anga dhidi ya boti ilizozitaja kuwa zinahusika katika usafirishaji wa dawa za kulevya. Pia imepeleka meli za kivita na vikosi nje ya mwambao wa Venezuela.