BAADA ya kukaa nje ya uwanja karibu nusu msimu, kiungo wa zamani wa Simba na Yanga, Jonas Mkude anahesabu siku tu kwa sasa kwani anatarajiwa kuwa sehemu ya kikosi cha Singida Black Stars akiungana na Khalid Aucho waliyekipiga msimu uliopita wakiwa Jangwani.
Ipo hivi. Mkude aliyependekezwa na kocha Miguel Gamond tangu mwanzoni mwa msimu huu, lakini akishindwa kuungana na timu kutokana na ishu ya maslahi kuchelewa tayari ameingizwa katika mfumo na dirisha dogo linalotarajiwa kufunguliwa Januari mwakani ili kuiongezea nguvu timu hiyo inayoshiriki makundi ya ya Kombe la Shirikisho Afrika.
Chanzo cha kuaminika kutoka ndani ya Singida kimeliambia Mwanaspoti kuwa mazungumzo yamefanyika na kilichobaki ni dirisha kufunguliwa.
“Kuhusu Mkude kutua Singida dirisha dogo ni kweli mazungumzo yamefanyika na makubaliano yapo kwenye hatua nzuri lengo la kuongezwa kwake ni kuongeza nguvu eneo la kiungo ambalo sasa lina Aucho na Khalid Habib ‘Gego’,” kilisema chanzo.
“Mkude ni pendekezo la kocha Gamondi anaamini akiongezwa eneo hilo halitakuwa na changamoto hata akikosekana mmoja kama ilivyotokea Aucho aliposhindwa kusafiri mambo yalikuwa magumu kwani wachezaji wenye uzoefu wa mashindano ya kimataifa walikosekana.”
Mwanaspoti lilizungumza na Mkude ambaye alidai kwa miezi sita anaendelea kujifua na ana mpango wa kurudi dirisha dogo. “Nipo ila sina timu nafanya mazoezi mwenyewe. Mpango wangu ni kurudi tena uwanjani dirisha dogo. Sipo tayari kuweka wazi ni wapi nitacheza ila mashabiki na wadau wa soka watarajie kuniona tena uwanjani Januari,” alisema Mkude aliyetamba na Simba kwa misimu 10 kabla ya kutua Yanga misimu mitatu iliyopita.
“Kuna ofa nyingi nimepokea bado hatujafikia makubaliano siwezi kusema nacheza timu fulani na baadaye nikaonekana timu tofauti mambo yakikamilika nitaweka wazi mimi au timu yenyewe itatoa taarifa,” aliongeza nyota huyo.