MSHAMBULIAJI wa Coastal Union, Maabad Maulid Maabad, ameibuka shujaa wa kikosi hicho kufuatia kufunga mabao mawili katika ushindi wa 2-0 dhidi ya Mbeya City.
Mechi hiyo ya Ligi Kuu Bara iliyochezwa leo Jumatano Novemba 26, 2025 kwenye Uwanja wa Mkwakwani, Tanga, wenyeji Coastal Union iliingia ikiwa haijapata ushindi katika mechi nne zilizopita tangu mara ya mwisho iichape Tanzania Prisons bao 1-0 uwanjani hapo.
Maabad alianza kufunga bao dakika ya nne, kisha akaongeza la pili dakika ya 42 kwa mkwaju wa penalti. Mkwaju huo wa penalti ulitokana na Kevin Pemba kumfanyia faulo Meshack Mwamita eneo la hatari.
Kipindi cha kwanza, Coastal Union inayonolewa na Kocha Hemed Muya, ilikwenda mapumziko ikiongoza kwa mabao 2-0, hali iliyolifanya benchi la ufundi la Mbeya City likiongozwa na Malale Hamsini kurudi kipindi cha pili na mpango mpya wa kuweka mzani sawa.
Hata hivyo, katika kipindi cha pili, hakukuwa na mabadiliko yoyote katika ubao wa matokeo na kuifanya Coastal Union kupata ushindi wa pili Ligi Kuu Bara msimu huu katika mechi sita ilizocheza. Imeshinda mbili, sare mbili na kupoteza mbili. Pia timu hiyo imefunga mabao matano na kuruhusu idadi kama hiyo.
Kwa upande wa Mbeya City, hii ni mechi ya nane ikiwa imekusanya pointi nane ikiwa na wastani wa kupata pointi moja kila mechi, imefunga mabao saba na kuruhusu tisa.
Hii ni mechi ya nne mfululizo Mbeya City inashindwa kupata ushindi, mara ya mwisho iliichapa KMC mabao 3-0, Oktoba 18, 2025. Baada ya hapo, ikafungwa 2-1 na Tanzania Prisons, ikatoka 2-2 na JKT Tanzania, kisha ikapigwa 1-0 na Mashujaa kabla ya leo kufungwa 2-0 na Coastal Union. Mechi ijayo Novemba 30, 2025, nyumbani dhidi ya Namungo. Awali ilianza kwa kuifunga Fountain Gate bao 1-0, ikapigwa 2-0 na Azam, ikaja kuikazia Yanga kwa kutoka 0-0.
Coastal Union ambayo leo imezinduka ikiwa nyumbani, ilianza msimu kwa ushindi wa bao 1-0 dhidi ya Tanzania Prisons, ikafungwa 2-1 na JKT Tanzania, ikifuatia kichapo kingine cha mabao 2-0 dhidi ya Dodoma Jiji, kisha 0-0 ilipokutana na Mtibwa Sugar. Pia sare nyingine ya 1-1 na Fountain Gate, kabla ya leo kushinda 2-0 dhidi ya Mbeya City.