UMESIKIA kilichoikuta Yanga huko Algeria? Basi kama hujui ni kwamba JS Kabylie watakaovaana nao Ijumaa Novemba 28, 2025 wameanza vitimbi mapema, lakini kama zali Mamelodi Sundowns ya Afrika Kusini ikawa mkombozi ikiwaokoa na figisu za kuzuiwa mabegi ya vifaa vya mazoezi.
Yanga imeifuata JS Kabylie kwa ajili ya mechi ya Kundi B la Ligi ya Mabingwa Afrika itakayopigwa keshokutwa Ijumaa, lakini ikakutana na mtihani uwanja wa ndege ilipotua jana Jumanne Novemba 25, 2025 kwa kukalishwa saa kama nne, huku mabegi ya vifaa vya mazoezi yakiwa hayaonekani.
Hata hivyo, inaelezwa wakati mabosi wa Yanga wakipambana kusaka mizigo, Mamelodi ambao walitua nchini humo kwa mechi dhidi ya MC Alger walikumbana na kadhia hiyo baada ya Waarabu kujichanganya kuzuia baadhi ya vifaa vya Wasauzi hao.
Mamelodi ilikutana na Yanga huko Dubai na wote wakiwa njiani kwenda Algeria na walitua pamoja jijini Algiers na ndipo wakakumbana na figisu, lakini Mamelodi walipocharuka ikabidi kila kitu kiachiwe.
Ofisa Habari wa Yanga, Ally Kamwe ameiambia Mwanaspoti kwa simu kwamba, wakati Mamelodi wakipambana kutafuta mizigo yao ndipo maofisa wa uwanja wa ndege wakatoa na vifaa vyao na ikawa ni wepesi kwa Yanga ambao walishasota kwa saa tatu na ushei bila mafanikio.
Kamwe amesema ucheleweshaji huo uliharibu mpango kazi wa makocha ambao walilazimika kuipa timu yao mazoezi ya gym pekee.
“Ni kweli tulikutana na huo usumbufu jana. Wakati tunafika hapa Algeria unajua saa nne kuwa uwanja wa ndege ni muda mrefu sana, lakini ndio maisha ya soka la Afrika,” amesema Kamwe.
“Walizuia pia mizigo ya timu ambayo ilikuwa na vifaa vya mazoezi. walichojichanganya walichukua na mingine ya Mamelodi ambao nao tulikuwa safarini wanakuja kucheza hapa. Sasa walipoanza kuwatafutia ikawalazimu kutoa na ile ya kwetu. Walikuwa wamepeleka stoo, hatujui malengo yao yalikuwa yapi hatukufahamu, lakini baadaye wakatupatia na tupo sawa.”
Ofisa Habari huyo ameongeza kuwa: “Makocha wanaendelea na maandalizi ya kukiandaa kikosi, kila mchezaji yuko sawasawa na leo (jana) kutakuwa na mazoezi mara mbili kwa siku tukianza asubuhi na kumalizia jioni ili kujinoa zaidi.”
Yanga itakutana na JS Kabylie katika mechi ya pili ya Ligi ya Mabingwa Afrika kwenye Uwanja wa Hocine Ait Ahmed uliopo mji wa Boukhalifa.