KOCHA Mkuu wa Wydad Athletic, Amine Benhachem, amesema mechi ya kesho dhidi ya wenyeji Azam haitakuwa rahisi kutokana na ubora wa wapinzani wao wakiongozwa na Kocha Mkuu, Florent Ibenge.
Benhachem amesema Azam licha ya kuwa timu changa kwenye mashindano ya Afrika, lakini inaundwa na kocha mzoefu na wachezaji wenye nguvu ambapo timu hiyo hairuhusu mpinzani kutawala mchezo.
Ibenge ambaye huu ni msimu wa kwanza anainoa Azam, ana rekodi ya kushinda ubingwa wa Kombe la Shirikisho Afrika akiwa na RS Berkane msimu wa 2021-2022.
“Wana kocha mzoefu (Florent Ibenge) na wachezaji wanaojua vyema mashindano ya Afrika. Si rahisi kukabiliana na timu changa, iliyo na nguvu, itakuwa mechi ngumu.
“Si rahisi kuwa bora dhidi ya Azam kwani ni timu inayomiliki mpira ambayo huwa hairuhusu mpinzani kugusa mpira. Mchezo wao wa kujijenga na kasi katika mabadiliko ni tofauti na kile tunachokiona kwa kawaida barani Afrika,” amesema.
Aidha kocha huyo amesema, licha ya ubora wa Azam, lakini Wydad itaingia kwa akili ya kucheza na kutafuta pointi tatu zingine kwenye mechi hizo za makundi.
“Daima tunatafuta pointi tatu, tuko hapa kucheza, hayo ndio malengo yetu, tunataka kushinda mchezo wa pili, haitakuwa rahisi lazima tupambane kwa kutumia ubora wetu.
“Tuna utambulisho wetu wenyewe na mkakati, ambao tutautumia kufuzu na hilo ndilo muhimu zaidi, tuna timu yenye wachezaji wenye ubora mkubwa,” amesema.
Kesho Ijumaa Novemba 28, 2025, Azam itakuwa mwenyeji wa Wydad kwenye mechi ya pili ya makundi Kombe la Shirikisho Afrika, itakayopigwa kwenye Uwanja wa New Amaan Complex, Zanzibar, kuanzia saa 1:00 usiku.
Mechi ya kwanza, Azam ilifungwa 2-0 ugenini na AS Maniema Union, huku Wydad ikiichapa Nairobi United mabao 3-0.