WIKIENDI imeanza mapema. Ndio, ule uhondo wa mechi za kimataifa barani Afrika hatua ya makundi unaendelea leo Ijumaa kwa wawakilishi wawili wa Tanzania, Yanga na Azam FC kutupa karata ya pili katika Ligi ya Mabingwa na Kombe la Shirikisho na kwa hakika moto utawaka!
Yanga iliyopo Kundi B katika Ligi ya Mabingwa itakuwa na kibarua ugenini mbele ya wenyeji wao, JS Kabylie ya Algeria, huku Azam ikirudia nyumbani kuipokea Wydad Casablanca ya Morocco inayomrudisha nchini, nyota wa zamani wa Yanga, Stephane Aziz KI katika Kombe la Shirikisho.
Kitendo cha Yanga kwenda Algeria mara mbili mfululizo kisha kupewa maumivu, ni mtihani mgumu unaomkabili kocha wa kikosi hicho, Pedro Goncalves baada ya kufaulu ikiwa nyumbani.
Pedro anayeiongoza Yanga katika mechi hiyo ya nne baada ya awali kupata ushindi wa bao 1-0 mbele ya AS FAR Rabat ya Morocco katika pambano la kwanza la kundi hilo, ameweka bayana anakutana na timu kali, lakini wamejipanga kuwasapraizi wenyeji waliopoteza 4-1 kw Al Ahly.
Rekodi zinaonyesha, Yanga katika michuano ya CAF, mara ya mwisho kucheza Algeria na kurudi na ushindi ilikuwa Juni 3, 2023 katika fainali ya Kombe la Shirikisho dhidi ya USM Alger iliposhinda 1-0, hata hivyo ushindi huo haukuipa taji baada ya kulala 2-1 nyumbani na kupishana na ubingwa kwa kanuni ya bao la ugenini, licha ya matokeo ya jumla kuwa sare ya mabao 2-2.
Baada ya hapo, Yanga imeenda mara mbili Algeria, Novemba 24, 2023 ilikutana na kichapo cha 3-0 kutoka kwa CR Belouizdad katika makundi Ligi ya Mabingwa Afrika na Desemba 7 mwka jana ililala tena 2-0 kwa MC Alger ikiwa pia ni hatua ya makundi Ligi ya Mabingwa.
Sasa leo kuanzia saa 1:00 usiku, Yanga itakuwa kwenye Uwanja wa Hocine Al Ahmed lililopo Tizi Ouz, Algeria kusaka pointi nyingine tatu dhidi ya JS Kabylie na kocha Pedro amefichua ataingia uwanjani kwa nidhamu na kutumia mbinu za kushambulia kwa kushtukiza (counter-attack).
Pedro katika mechi iliyopita dhidi ya FAR Rabat, alikabiliwa na mtihani wa kuhakikisha Yanga inapata ushindi katika mechi ya kwanza ya makundi, kwani ilikuwa haijawahi kufanya hivyo tangu mwaka 2016, ikipoteza tano tena zote mbele ya timu zenye asili ya Kiarabu.
Baada ya kuushinda mtihani huo, leo anao mwingine kuhakikisha Yanga inashinda kwa mara nyingine ikiwa Algeria baada ya kushindwa katika mechi mbili za misimu miwili mfululizo.
Ugumu ambao Pedro anatarajiwa kukutana nao ni aina ya timu anayoikabili, kwani rekodi zinaonyesha JS Kabylie ikiwa nyumbani ni ngumu kufungika, japo katika soka lolote linaweza kutokea.
Katika michuano ya CAF, JS Kabylie mara ya mwisho kupoteza nyumbani ilikuwa Aprili 21, 2023 ilipofungwa 1-0 na Esperance ya Tunisia. Msimu huu, mechi mbili ilizocheza imeshinda dhidi ya Bibiani Gold Stars (5-0) na US Monastir (2-1).
Hata hivyo, rekodi zinaonyesha katika mechi 17 za CAF tangu Januari 5, 2021, JS Kabylie ikiwa nyumbani imeshinda 13, sare tatu na kupoteza moja tu. Msimu huu katika michuano ya ndani, pia haijapoteza nyumbani.
NGUVU YA YANGA
Kwa mujibu wa Makamu wa Rais wa Yanga, Arafat Haji, kikosi cha timu hiyo kilichosafiri na wachezaji 22, wote wapo katika hali nzuri, hivyo benchi la ufundi litaamua nani aanze, huku ikiwaacha saba Dar kutokana na sababu mbalimbali. Kati ya wale walioachwa Dar, hakuna hata mmoja aliyecheza mechi iliyopita dhidi ya AS FAR Rabat, hivyo ni wazi kikosi cha Yanga kipo kamili kupambania ushindi.
Mara ya mwisho kocha Pedro alisema anajivunia kuwa na kikosi chenye wachezaji wengi wenye vipaji, huku akilisifia eneo la kiungo kuwa na nguvu kubwa ya kufanikisha malengo ya ushindi.
Uwepo wa Duke Abuya, Mudathir Yahya, Mohamed Doumbia, Mousa Balla Conte, Pacome Zouzoua, Maxi Nzengeli na wengineo, unaipa Yanga jeuri ya kuonyeshana ubavu na Waarabu hao wakiwa kwao.
Pedro aliliambia Mwanaspoti kuwa, kitendo cha timu hiyo kuwahi nchini Algeria kuzoea hali gumu ya hewa itambeba, huku akiweka bayana leo kikosi kitaingia na mbinu za kushambulia kwa akili.
Yanga ililazimika kufanya mazoezi mara mbili tangu juzi ikiwa ni hesabu za kocha Goncalves ambaye alitaka wachezaji wake kuzoea hali ya hewa ya baridi kali ndani ya nchi hiyo.
Yanga ilikutana na mvua ya barafu ambayo ilimlazimu kocha huyo Mreno kuwapambania mastaa waizoee kwa haraka ili isiwasumbue leo siku ya mechi hiyo.
“Moja ya vitu muhimu ni kuwahi kuja hapa, hapa kuna hali ya hewa tofauti kabisa na Tanzania tulikotoka, baridi ni kali sana ambayo kama tutakuwa na vipindi vitatu vya mazoezi vitasaidia wachezaji kukabiliana baridi hii kali,” alisema Pedro na kuongeza;
“Tupo sawa hadi sasa baada ya kufanya mazoezi mara tatu hapa, ila leo (jana) tutafanya mazoezi ya mwisho na hatuna mtu aliyekumbana na kuugua kutokana na utofauti wa hali ya hewa.”
Pedro alisema watashuka uwanjani kwa mbinu za kucheza kwa nidhamu na kufanya mashambulizi ya kushtukiza lakini yakatakayokuwa ya nguvu mara watakaponasa mipira ili kupata mabao.
BATO LA VIUNGO
Hata hivyo, JS Kabylie ikiwa na hasira za kupoteza mechi ya kwanza ugenini dhidi ya Al Ahly ya Misri, inarejea nyumbani ikiwa na kikosi imara. Pale kati ambapo Pedro inatambia, wapinzani wao kuna watu wa kazi wanaoifahamu vizuri Yanga kwani wamekutana nayo mara kadhaa katika Ligi Kuu Bara.
Kuna kiungo wa zamani wa Simba, Babacar Sarr aliyekichafua mwanzo mwisho dhidi ya Al Ahly. Pia kiungo wa zamani wa Singida Black Stars, Josaphat Arthur Bada ambaye wakati JS Kabylie ikifungwa na Al Ahly, alicheza dakika 45 za kwanza, akampisha Mohamed Amine Madani.
Viungo hao kama wakianza leo, watakumbushia namna walivyokuwa wakikutana na Yanga katika mechi za Ligi Kuu Bara kabla ya kila mmoja kuondoka kivyake na sasa wanacheza kikosi kimoja kinachonolewa na kocha Josef Zinnbauer.
AZAM v WYDAD KITAELEWEKA
Katika ardhi ya Zanzibar kwenye Uwanja wa New Amaan Complex, Azam FC ina dakika 90 za kutetea heshima nyumbani, itakapoikaribisha Wydad Athletic ya Morocco katika mechi ya pili ya Kundi B ya Kombe la Shirikisho Afrika.
Hii ni baada ya kupoteza mechi ya kwanza ugenini kwa mabao 2-0 mbele ya Union Maniema ya DR Congo, huku Waarabu hao wakitoka kushinda nyumbani kwa mabao 3-0 dhidi ya Nairobi City 3-0, matokeo yaliyowafanya kuongoza kundi.
Azam inasema inawezekana kushinda mbele ya Wydad na ilipotoka DR Congo ikaelekea moja kwa moja Zanzibar, kujiandaa na mechi hiyo ya leo.
KILICHOIANGUSHA UGENINI
Kitu kilichoiangusha Azam katika mechi iliyopita ilikuwa ni kupoteza nafasi za kufunga ambapo tangu imetua Zanzibar timu hiyo imekuwa ikifanya mambo ya ufundi kufunga mabao, pia namna ya kutengeneza mashambulizi ya kasi na kusuka mbinu za kuwazima washambuliaji wa Wydad.
Mwanaspoti linafahamu kuwa, kocha Florent Ibenge wa Azam amekuwa na kikao kizito na wachezaji wa kikosi hicho akitengeneza utulivu, huku akisisitiza umuhimu wa kupata matokeo ya ushindi na kuzingatia kucheza kwa nidhamu.
WACHEZAJI BORA
Azam itawategemea mshambulaiji Jephte Kitambala ambaye tangu akiwa DR Congo baada ya kucheza dhidi ya AS Maniema alifanya kikao na Ibenge, akimnoa na kumpa mbinu jinsi ya kutulia na kurekebisha makosa akitokea kupoteza nafasi nyingi za kufunga siku hiyo.
Mbali na Kitambala, Azam itategemea nguvu ya viungo kama Feisal Salum, Idd Seleman na Abdul Seleman ‘Sopu’.
MSIKIE FEI TOTO
Kiungo wa Azam, Feisal Salum ‘alisema baada ya kutokuwa vizuri katika mechi iliyopita, hawatarajii kurudia makosa dhidi ya Wydad, kwani wamefanyia kazi kile walichoelekezwa na kocha Ibenge, kilichobaki ni dakika 90 za uwanjani.
“Hakuna mechi rahisi, tangu tumeanza hadi sasa juhudi ndio imetufikisha hapa, hatuna cha kupoteza, tunataka matokeo mazuri mbele ya Wydad bila kujali tunakutana na timu yenye ubora wa aina gani, sisi pia ni bora,” alisema Fei aliyegusia pia kukutana kwake na Aziz Ki aliyewahi kucheza naye walipokuwa Yanga kwa kusema;
“Kuhusu Aziz Ki, siendi kucheza naye peke yake, tunakutana na timu yenye nyota 11, nafikiri jibu sahihi hatuangalii tunaenda kupambana na nani, tunachoangalia ni kufanyia kazi maelezo tuliyopewa ili kupata matokeo mazuri na timu kurudi kwenye morali.”
Fei Toto alisema ubora wa mashindano hayo unaongeza ushindani, hivyo ili wao pia wawe bora ni kukubali kuonyesha ushindani kwa wapinzani ili waweze kufikia malengo ya kufanya vizuri zaidi.
“Awali, tulikuwa tumepanga kuhakikisha tunafika makundi, tayari rekodi tumeiandika, kwa sasa tumesahau kila kitu na tunapambana kuandika nyingine ambayo bila juhudi haiwezi kuwa rahisi.”
NJE YA UWANJA
Nje ya uwanja, Azam inajua haina mashabiki wengi, lakini imepunguza viingilio ambapo kiasi cha chini ni Sh1,000 yaani buku kuitazama mechi hiyo ili, hii yote ni kuvutia wengi.
Rekodi zinaonyesha kuwa, Wydad sio mpinzani mwepesi ambapo msimu huu imesuka kikosi chake kizito ikitaka kurudisha heshima ambayo ilitetereka miaka ya hivi karibuni.
Habari mbaya kwa Azam ni kwamba kwenye kikosi cha Wydad kuna Stephan Aziz KI ambaye ni msimu uliopita aliuzwa kwa Waarabu hao akitokea Yanga.
Aziz KI ana rekodi bora na Azam ambapo kwenye mechi nane alizokutana nayo ameifunga mabao sita na asisti moja.
Mbali na Aziz KI, Azam inatakiwa kuwa makini na viungo wengine Thembinkosi Lorch, ambaye anatokea pembeni akiwa ni mkali wa pasi za mwisho na hata kufunga. Wengine ni Nordin Amrabat huku eneo la kiungo mkabaji kukiwa na Mkongomani Joseph Bakasu.
Winga Hakim Ziyech hataweza kuwa sehemu ya kikosi hicho kwani usajili wake wa CAF haukukamilika ila huenda atakutana na Azam kwenye mechi ya marudiano mwakani.
Mbali na hao, Azam itatakiwa kuwa makini na beki wa kulia Mohammed Bouchouri mwenye uraia wa Ubelgiji ambaye anajua kushambulia kwa kasi na hata kufunga.
Mechi hiyo itaamuliwa na mwamuzi Antoine Essouma kutoka Camerron ambaye Azam haitakuwa na kazi naye ngumu kwani hana rekodi ya kumwaga sana kadi za njano wala nyekundu.
Essouma atasaidiwa na raia wenzake wa Cameroon Elvis Nguegoue atakayekuwa msaidizi wa kwanza, wa pili Rodrigue Mpele wakati mwamuzi wa nne ni Yannick Fodouop.
* Imeandikwa na Omary Mdose, Victoria Melkiad, Khatimu Naheka na Charity James