Marais wa Marekani kwa kawaida huwa wanakumbwa na janga la kupungua umaarufu wa muda mfupi baada ya kuingia madarakani. Lakini kwa mujibu wa The Economist, hakuna rais katika miongo ya hivi karibuni ambaye amepitia janga la kupungua mno umaarufu wake kama lilivyomkuba janga hilo Donald Trump.
Kwa mujibu wa jarida hilo, mwanzoni mwa muhula wa pili wa Donald Trump, mtazamo wa Wamarekani ulikuwa umegawika takriban sawasawa kati ya wafuasi na wapinzani wa Trump, lakini hivi sasa hali imebadilika.
Kwa mujibu wa takwimu za The Economist, umaarufu halisi wa Trump sasa uko chini kuliko wa kiongozi yeyote aliyewahi kutawala Marekani hasa baada ya serikali ya Trump kuvunja rekodi ya kufungwa kwa muda mrefu zaidi kwa kiwango ambacho hakijawahi kutokea katika historia ya Marekani.
Umaarufu wa rais wa Marekani umepungua kwa asilimia 19 na kwa mujibu wa takwimu za The Economist, asilimia 57 ya Wamarekani hawamkubali kabisa, asilimia 38 tu ndio wanaomkubali huku 4% wakiwa wako kati na kati.
Wamarekani hawafurahishwi hasa na jinsi Trump anavyoshughulikia mfumuko wa bei na mgogoro wa uchumi, masuala mawili muhimu katika uchaguzi uliopita ambayo Trump alidai atayatatua haraka.
Wapiga kura wachanga, wasio wazungu, ambao wengi wao walikuwa wamekikataa chama cha Democratic kutokana na wasiwasi waliokuwa nao juu ya gharama za maisha, sasa wanajuta na wamemgeukia Trump haraka mno kuliko watu wa makundi mengine.
Data za YouGov pia zinaoyesha kwamba Wamarekani hivi sasa hawakubaliani na jinsi Trump anavyoshughulikia uhamiaji, suala jingine ambalo lilitoa mchango mkubwa katika kuchaguliwa kwake tena, kuwa rais wa Marekani.