Shirikisho la Soka la Jamhuri ya Kiislamu ya Iran (FFIRI) limetangaza kuwa halitohudhuria droo ya Kombe la Dunia FIFA 2026 wiki ijayo mjini Washington, baada ya Marekani kukataa kutoa viza kwa baadhi ya wajumbe wa msafara wao.
Msemaji wa Shirikisho la Soka la Iran, Amir Mehdi Alavi, alisema jana Ijumaa kuwa uamuzi huo ulifikiwa baada ya mashauriano ya ndani na wizara husika za Michezo na Vijana pamoja na Mambo ya Nje.
Alisisitiza kuwa: “Uamuzi huu umechukuliwa baada ya baadhi ya wajumbe kunyimwa viza.”
Shirikisho hilo tayari limefikisha malalamiko kwa Rais wa Shirikisho la Soka Duniani, FIFA, Gianni Infantino na Katibu Mkuu, Mattias Grafström, huku FIFA ikiahidi kulichunguza suala hilo. Alavi ameonya kuwa hatua ya Washington inaweza kuathiri maandalizi na safari za baadaye za Timu ya Taifa ya Soka ya Iran ambayo ni maarufu kama Team Melli, akisema huenda ikawa na athari kwa wachezaji na benchi la ufundi wakati wa mashindano.
Droo ya Kombe la Dunia 2026 imepangwa kufanyika Desemba 5 mjini Washington, DC. Alavi ameeleza kuwa mzozo huu wa viza ni wa kipekee katika historia ya soka ya Iran, akibainisha kuwa haijawahi kutokea kwa wajumbe wa shirikisho au kikosi cha Team Melli kunyimwa viza katika mashindano ya kimataifa.
Kwa mujibu wa gazeti la Tehran Times, Marekani imetoa viza kwa wajumbe wanne pekee wa msafara wa Shirikisho la Soka la Iran — kocha mkuu Amir Ghalenoei, mkurugenzi mtendaji Mehdi Kharati, mkurugenzi wa mahusiano ya kimataifa Omid Jamali, na msemaji Amir Mehdi Alavi. Ombi la viza kwa maafisa wengine, akiwemo Rais wa Shirikisho la Soka la Iran, Mehdi Taj na Makamu wake Mehdi Nabi, limekataliwa.
Alhamisi, Taj alilaani uamuzi huo akisema ni wa kisiasa.
Taj aliongeza kuwa: “Tumemwambia Rais wa FIFA, Bw. Infantino, kuwa uamuzi huo ni wa kisiasa na FIFA lazima iwaambie [Marekani] waache tabia hii.”
Timu ya Taifa ya Soka ya Iran ilifuzu kucheza Kombe la Dunia 2026 tangu Machi, ikihakikisha ushiriki wa mara ya nne mfululizo na wa saba kwa jumla katika kombe hilo.
Mashindano hayo yataandaliwa kwa pamoja na Marekani, Canada na Mexico.