Shirika la Taifa la Usimamizi wa Maafa la Indonesia BNPB limetangaza leo kuwa idadi ya waliofariki kutokana na mafuriko na maporomoko ya ardhi yaliyotokea wiki hii sasa imefikia 248, huku zaidi ya watu 100 wakiwa hawajulikani walipo, baada ya waokoaji katika wilaya ya Agam ya Sumatra Magharibi kupata miili zaidi.
BNPB imeongeza kuwa, zaidi ya watu 500 pia wamejeruhiwa.
Suharyanto, mkuu wa BNPB, ambaye, kama Waindonesia wengi, anatumia jina moja tu amesema: “idadi ya vifo inaaminika kuongezeka, kwa sababu miili mingi bado haijapatikana, huku mingi mingine ikiwa haijafikiwa”.
Maeneo mengi ya Indonesia, Malaysia na Thailand yamekumbwa na mvua kubwa ya siku kadhaa, ambayo imesababisha vifo vya watu wapatao 400 katika nchi hizo tatu kwa jumla, baada ya dhoruba adimu ya kitropiki kutokea katika Mlango-Bahari wa Malacca kati ya Rasi ya Malay na kisiwa cha Sumatra cha Indonesia.
Katika upande mwingine, watu wapatao 123 wamepoteza maisha na wengine 130 hawajulikani walipo nchini Sri Lanka kutokana na kimbunga cha Ditwah kilichoikumba nchi hiyo.
Katika wilaya ya Kandy, vimeripotiwa vifo 51 huku wengine 67 wakiwa hawajulikani walipo.
Wakati huo huo, katika eneo la Badulla, watu 35 wameripotiwa kufariki dunia, kwa mujibu wa chombo cha habari cha eneo hilo.
Inaripotiwa kuwa, kimbunga hicho kilichotokea Novemba 26, kimeathiri jumla watu 373,428 kutoka kaya 102,877, huku watu wengine 43, 925 wakipatiwa maeneo maalumu ya hifadhi.
Tayari, mamlaka husika zimetoa tahadhari za uwezekano wa kutokea mafuriko makubwa, zikiwataka watu waishio maeneo ya mabondeni kukimbilia kwenye maeneo ya usalama.
Rais wa Sri Lanka Anura Kumara Dissanayake ameagiza vikosi vya wanajeshi 20,000 kuanza shughuli za uokozi katika maeneo yaliyoathirika zaidi…/