Rais wa Azam FC, Nassor Idrissa ‘Father’ amechaguliwa kuwa Mwenyekiti wa Bodi ya Ligi Kuu Tanzania (TPLB) leo Novemba 29, 2025 jijini Dar es Salaam.
Mwenyekiti wa Kamati ya Uchaguzi ya Shirikisho la Mpira wa Miguu Tanzania (TFF), Kiomoni Kibamba amesema kuwa Idrissa amepata kura nyingi dhidi ya Hosseah Lugano hivyo ndiye mshindi.
“Naomba sasa kutangaza matokeo ya Mwenyekiti wa Bodi ya Ligi kama ifuatavyo. Jumla ya Kura zilizopigwa 14, kura iliyoharibika ni moja.
“Ndugu Hosseah Lugano amepata kura sita na Nassor amepata kura saba. Namtangaza ndugu Nassor Iddrisa kuwa mwenyekiti mteule wa Bodi ya Ligi Tanzania,” amesema Kibamba.
Akizungumza baada ya kutangazwa mshindi, Father amesema kuwa uongozi mpya unahitaji ushirikiano.
“Mlionipa kura mimi hamkukosea na mliompa Lugano hamkukosea. Wote tupo katika jahazi moja. Bado sisi ni wenyeviti, kuna watu nyuma yetu wanatuhitaji. Kwa pamoja najua tutashirikiana kwenda mbele zaidi.
“Tuendelee kushirikiana, milango iko wazi ili kuendeleza mpira wetu. Tufanye kazi kwa weledi ili vizazi vijavyo viweze kurithi yale mazuri ambayo tutayafanya sisi,” amesema Father.