Mbeya. Shule za Sekondari 84, Halmashauri ya Wilaya ya Mbeya zimeanza kunufaika na matumizi kidigitali kujifunza na kujifunzia kupitia programu ya Teknolojia ya Habari na Mawasiliano (Tehama).
Hatua hiyo imekuja baada uanzishwaji wa maabara zaTehama kwa lengo la kuwezesha walimu kufundishia wanafunzi mitaala mbalimbali kupitia mifumo ya kidigitali.
Kauli hiyo imetolewa leo Ijumaa Novemba 28, 2025 na Mbunge wa Mbeya vijijini, Patali Shida baada ya kukabidhi Komyuta 84 katika shule nne za sekondari Wilaya ya Mbeya ikiwa ni awamu ya kwanza.
“Lengo la programu hiyo ni kuanzia katika elimu ya Msingi, lakini kwa sasa nimeanzia katika shule za sekondari nne kati ya 84 zilizopo lengo ni kutimiza maoni ya kuhakikisha Mbeya Vijijini inakuwa kidigitali, “amesema.
Manufaa ya programu
Patali amesema kompyuta zimefungwa mifumo rasmi ya kidigitali yenye mitihani rejea iliyo chapishwa tangu mwaka 1988 hadi mwaka 2024, ambayo itasaidia kuipunguzia gharama Serikali ya uchapishaji na uandaaji wa maduhuri.
“Lengo ni kujenga kizazi ambacho kitakuwa na uelewa mkubwa kuhusu masuala ya kidigitali sambamba na kuwezesha kufungua mitandao ya shule husika,” amesema.
Katika hatua nyingine, ameshauri kupitia mradi huo walimu waweke mifumo mizuri kwa kutoa fursa kwa vijana nje ya kupata elimu kwa utaratibu maalumu.
“Nimewaomba walimu pamoja na kufundishia watoe elimu ya matumizi mitandao yenye tija ya kwa maslahi ya Taifa na vizazi vijavyo,”amesema.
Wakati huo huo amesema kupitia programu hiyo asilimia 60 ya vijana wenye uhitaji watajengewa uwezo wa masuala ya Teknolojia ya Habari na Mawasiliano (Tehama) ili kuondokana na changamoto ya ajira.
Mwalimu Mkuu wa Shule ya Sekondari Usongwe, Valeria Mtega amesema mifumo ya matumizi ya Tehama itasaidia kuboresha walimu fundishaji kidigitali.
Kaimu Mkurugenzi Halmashauri ya Wilaya ya Mbeya Vijijini, Dindai Njile amesema watahakikisha katika shule husika wataalamu Tehama wanapelekwa ili kufikia malengo ya Sweika ya awamu ya sita.
“Kimsingi tunashukuru tutahakikisha walimu wanajengewa uwezo kupitia wataalamu wetu kuhusiana na matumizi ya Tehama kufundishia wanafunzi, “amesema.