Kimbembe huduma ofisi za Serikali za mitaa zilizochomwa moto

Hali hii imelazimu viongozi wa mitaa kubadili mtindo wa huduma; badala ya kufuatwa ofisini, sasa baadhi humfuata mwananchi alipo baada ya kuwasiliana naye kwa simu na kukubaliana pa kukutana.

Kwa mujibu wa wananchi, si huduma zote zinapatikana. Nyaraka muhimu kama za urasimishaji ndiyo basi tena. Kibaya zaidi ni hofu waliyonayo viongozi wa mitaa, kiasi cha baadhi yao kushindwa kupatikana.

Huu ndiyo uhalisia wa maisha mapya ya wananchi na changamoto wanazokabiliana nazo wanapohitaji huduma kwenye ofisi za Serikali za mitaa, baada ya baadhi kuchomwa moto Oktoba 29, 2025 wakati wa vurugu zilizoibuka.

Vurugu hizo ambazo chimbuko lake ni maandamano, zilisababisha kuchomwa moto kwa ofisi hizo, vituo vya polisi, vituo vya mafuta, magari, nyumba za watu binafsi, bajaji na pikipiki, huku biashara zikiharibiwa.

Matukio hayo, yameibua hofu kwa viongozi wa serikali za mitaa, baadhi wakishindwa hata kujitambulisha kwa vyeo vyao, wakidai hawajui waliochoma ofisi zao, wamepanga kufanya nini dhidi yao.

Lakini, wapo viongozi wa mitaa waliokaza mioyo, baada ya ofisi zao kuchomwa wameamua kutumia mabanda ya mamalishe na chini ya miti kuwa ofisi za muda, lakini wakichukua tahadhari.

Katikati ya hayo, Wizara ya Nchi, Ofisi ya Waziri Mkuu, Tawala za Mikoa na Serikali za Mitaa (Tamisemi), imewataka viongozi wa ofisi zilizochomwa moto kwenda kutoa huduma kwenye ofisi zisizoathiriwa katika maeneo ya jirani, wakati halmashauri zikiratibu urejeshaji wa zilizochomwa.

Viongozi wa mitaa waingia hofu

Mwananchi imetembelea maeneo kadhaa ya ofisi za Serikali za mitaa zilizoathiriwa Oktoba 29, ambako sasa huduma zinatolewa ama kwenye vibanda vya mamalishe vilivyo karibu na ofisi zilizochomwa moto au chini ya miti na kwingineko. Baadhi ya viongozi wa mitaa wanasubiri simu za wananchi wakiwa nyumbani kwao.

Imebainika katika utekelezaji wa majukumu yao, wapo wenye hofu ya kuendelea kutoa huduma, wakieleza aliyechoma ofisi moto, hatashindwa kuchoma hata nyumba zao, hivyo wana wasiwasi.

Novemba 26, katika ofisi ya Serikali ya Mtaa wa Ubungo Kisiwani, mwenyekiti na ofisa mtendaji waliendelea kutoa huduma, mmoja kwenye banda la mamalishe na mwingine chini ya mti uliokuwa jirani na ofisi iliyochomwa.

Mtendaji aliweka meza ya plastiki, benchi kuukuu na kiti kimoja cha plastiki kwenye moja ya mabanda ya mamalishe yaliyopo mita chache kutoka ilipokuwa ofisi ya Serikali ya mtaa na kuendelea na shughuli zake.

Kiongozi huyo alikuwa na mihuri miwili na mafaili machache mezani katika banda hilo dogo lililojengwa kwa mabati chakavu.

Kwa upande wake, mwenyekiti alitumia kivuli cha mti ulio jirani na ofisi iliyochomwa moto kama ofisi ya muda.

Mwenyekiti alipofuatwa ili kuzungumzia mazingira ya utendaji kazi tangu kuchomwa kwa ofisi Oktoba 29, ameeleza hofu na wasiwasi alionao, hivyo hakuwa tayari kuzungumza zaidi.

“Sitaki kuzungumza chochote, msinitafutie matatizo mimi na nyumba yangu ikaja kuchomwa, sitaki,” amesema alipohojiwa na Mwananchi.

Iliyokuwa ofisi ya mtaa huo, imebaki kuwa gofu, ikiwa imetapakaa jivu ndani kutokana na kuchomwa moto.

Mbali ya hayo, katika ofisi ya Serikali ya Mtaa wa Mabibo NIT ili uhudumiwe unalazimika kumpigia simu kiongozi na mpange wapi pa kukutana.

Jengo la ofisi hiyo liko katika hali mbaya baada ya kuteketezwa kwa moto. Hakukuwa na kiongozi yeyote ndani yake wala eneo la jirani, zaidi ya madereva wa bodaboda.

“Hapa siku hizi (viongozi) hawaji, kama una namba zao za simu wapigie,” amesema Siraji Manepe, dereva wa bodaboda aliyekuwa eneo hilo.

Amesema upatikanaji wa huduma kwa sasa umebadilika, inamlazimu mwananchi kuwasiliana na mwenyekiti au mtendaji, kisha wakubaliane pa kukutana ili kupata huduma.

Hali katika Mtaa wa Mabibo NIT, ndivyo ilivyo pia katika mitaa ya Shekilango, Sinza na Magomeni ambayo yote ofisi zake zilichomwa moto katika vurugu za Oktoba 29 mwaka huu. Ili upate huduma ni lazima kuwasiliana kwa simu na kiongozi husika na kupanga mnakutana wapi.

“Wengi sasa wanafanyia kazi huko walipo, kama unahitaji huduma unampigia simu, ofisini ndiyo kama hivyo. Kwa hiyo, anakufuata ulipo maana anaogopa usiende kwake,” amesema Juma Seko, Mkazi wa Shekilango.

Mwenyekiti wa Serikali ya Mtaa wa Kibamba, Sembuli Mgendi amesema imekuwa vigumu kutoa huduma kwa wananchi, kwani kila nyaraka na vifaa muhimu vya kufanyia kazi vimeungua pamoja na ofisi.

Miongoni mwa huduma zilizokwama amesema ni utoaji wa barua za utambulisho, ugongaji mihuri na upatikanaji wa nyaraka za urasimishaji ardhi uliokwamisha upatikanaji wa hatimiliki kwa wananchi.

“Ukiacha vilivyokwama, pia hatuna ofisi ya kutolea huduma, vitendeakazi vimeungua, kwa jumla hatuna namna ya kutoa huduma,” amesema.

Kwa upande wake, Mwenyekiti wa Serikali ya Mtaa wa Stop Over, Alex Msuka, amesema imekuwa vigumu kwake kukaa ofisini kwa sababu imechomwa moto.

Amesema kwa sasa huduma anatoa nje ya ofisi na si nyumbani kwake, kwa sababu hana uhakika kama waliochoma ofisi wanapanga kufanya nini dhidi yake.

“Kuna hofu kubwa kwetu viongozi, mtu unaogopa hadi kujitambulisha kwa cheo chako. Kuna wakati mtu akikuita mwenyekiti unahisi anakuchoma,” amesema.

Mtazamo wa wananchi

Dominick Maina, mkazi wa Sinza, Dar es Salaam amesema imekuwa vigumu kuwapata viongozi wa Serikali za mitaa, kwa kuwa wengi wana hofu na hawana ofisi.

“Unaweza kumpigia simu akakuuliza wewe nani na maswali mengine mengi. Wanahisi kuna watu wanawawinda, hawana amani. Tunaoteseka ni sisi maana hupati huduma kwa urahisi,” amesema.

Mbali na ugumu huo, Saumu Hamza, mkazi wa Magomeni amesema hata baadhi ya huduma hazipatikani kutokana na kuchomwa moto kwa ofisi hizo.

“Sisi viongozi wetu mihuri yao iliungua, umebaki wa mwenyekiti peke yake. Sasa kuna barua zinahitaji muhuri wa mtendaji na umeungua, ni mtihani,” amesema.

Amesema kwa sababu ya hali hiyo, amekosa barua ya utambulisho kwa ajili ya kuiwasilisha kwa mwajiri wake, akieleza imemgharimu fedha hadi kutambulishwa kwa namna nyingine.

Mussa Kaisi, mkazi wa Mabibo, amesema nyaraka zake muhimu zilizokuwa ofisi ya Serikali ya mtaa zimeungua pamoja na nyingine, hivyo amelazimika kuanza upya mchakato wa kuziandaa.

“Niliziacha kwa viongozi nikiamini ni eneo salama zaidi, bahati mbaya zimeungua pamoja na nyaraka nyingine. Tumekubaliana kuanza mchakato wa kuandaa mpya,” amesema.

Kauli ya Serikali

Mwananchi ilipomtafuta Waziri wa Tamisemi, Profesa Riziki Shemdoe, amewataka wananchi kwenye mitaa au kata zilizopata changamoto hiyo, waende mitaa na kata za jirani kuhudumiwa.

“Wananchi wa mitaa au kata zilizopata changamoto hiyo waende kwenye mitaa au kata za jirani ili kupata huduma husika wakati Serikali inaendelea na taratibu za kurejesha huduma,” amesema.

Vilevile, amesema watendaji wafanye kazi katika mitaa au kata za jirani wakati halmashauri husika zikiweka utaratibu wa kurejesha huduma hizo.

“Kwanza tuwape pole wananchi wanaopata shida hiyo. Lakini viongozi wao waende ofisi za jirani zilizo salama wakatoe huduma. Nao wananchi waende kufuata huduma katika maeneo ya jirani,” amesema.