Arusha. Waziri wa Maliasili na Utalii, Dk Ashatu Kijaji, amesema kuwa Tanzania ni salama na kuwakaribisha watalii kutoka nchi mbalimbali ili kujionea vivutio mbalimbali.
Dk Kijaji ambaye ameongozana na Naibu Waziri wa Maliasili na Utalii, Hamad Hassan Chande na Katibu Mkuu wa Wizara hiyo Dk Hassan Abbas,wako jijini Arusha,wakitembelea hifadhi mbalimbali kujiunza na kujionea shughuli mbalimbali za uhifadhi na utalii sambamba na kujitambulisha katika taasisi zilizopo chini ya wizara hiyo.
Akizungumza katika Hifadhi ya Taifa ya Ziwa Manyara jana Novemba 27, 2025, Waziri huyo amesema kuwa Tanzania ni salama na kuwataka Watanzania wasikae nyuma wajitokeze kuendelea kutembelea vivutio mbalimbali.
“Tanzania ni salama tunaendelea kupokea wageni wanaokuja kutembelea na kuona vivutio mbalimbali katika hifadhi zetu na sisi tunakwenda kutembelea hifadhi zote 21 na kukaribisha watalii zaidi waje kwani tuko tayari kuwapokea,tuachane na maneno mengine yanayosemwa wageni wetu karibuni sana,”amesema
Awali akiwa Makao Makuu ya Shirika la Hifadhi za Taifa (Tanapa), Dk Kijaji alikabidhi baadhi ya miundombinu ikiwemo magari mawili yatakayosaidia shughuli za uhifadhi katika Hifadhi ya Mlima Kilimanjaro ikiwemo doria na kupambana na moto.
“Tunashukuru Serikali ya China kwa kutupatia vitendea kazi hivi na tutavitumia kama ambavyo dhamira ya kutolewa kwake ilikuw,niwasihi tuvitunze na vifanye kazi ili tufikie malengo kuhakikisha tunaendelea na kazi ya uhifadhi na kufikia idadi ya watalii milioni nane mwaka 2030,” amesema.
Mmoja wa watalii hao, Caroline Johanes, amesema kuwa amekujaTanzania na familia yake na kuwa kujionea vivutio mbalimbali ambapo watatembelea hifadhi hizo kwa muda wa siku saba.
“Tuko kwa siku saba hapa na tumeanza leo kwa kutembelea Hifadhi ya Ziwa Manyara, tumeona wanyama wengi na tunaamini tutaendelea kuona wengine zaidi na mandhari nzuri zaidi katika hifadhi zingine na hali ya hewa ni nzuri sana ,” amesema.