Dar es Salaam. Chama cha Demokrasia na Maendeleo (Chadema), kimeungana na familia kuomboleza kifo cha Naomi Kaihula, aliyewahi kuwa mbunge kupitia chama hicho.
Kaihula, ambaye ni mama mzazi wa mwanamuziki wa Hip Hop, Gwamaka Kaihula maarufu King Crazy GK amefariki dunia usiku wa kuamkia Novemba 28, 2025, akipatiwa matibabu katika Hospitali ya Taifa Muhimbili (MNH).
Crazy GK alikuwa kiongozi wa kundi la East Coast Team.
Akizungumza na Mwananchi leo Novemba 29, 2025, Kaimu Katibu Mkuu wa Chadema, John Mnyika amesema wamepokea kwa masikitiko taarifa za kifo cha Kaihula na wanatoa pole kwa familia kutokana na kifo cha mpendwa wao, aliyekuwa kada wa chama hicho.
Amesema Kaihula alikuwa na mchango mkubwa ndani ya Chadema kwa sababu alijiunga wakati ambao wasomi wengi na wanaharakati walikuwa wanaogopa kujiunga na vyama vya upinzani, lakini yeye hakuogopa.
“Tulishiriki naye, wakati huo nikiwa Mkurugenzi wa Vijana wa Chadema na yeye akiwa Mkurugenzi wa Wanawake. Tukashiriki kuasisi mabaraza ya chama (Bavicha, Bawacha na Bazecha), yakaingizwa kwenye katiba mpya ya Chadema ya mwaka 2006,” amesema.
Mnyika amesema mwaka 2009, Kaihula aliteuliwa kuwa Katibu wa Baraza la Wanawake wa Chadema (Bawacha), kwa hiyo watamkumbuka kwa mchango wake katika ujenzi wa msingi wa awali wa baraza hilo.
Amesema aliteuliwa kuwa mbunge wa viti maalumu kupitia chama hicho mwaka 2010 mpaka 2015, akieleza watamkumbuka kwa uwakilishi wake bungeni kupitia Chadema kutokana na michango na hoja zake.
“Kwa kiwango kikubwa, mambo ambayo ameacha alama katika Chadema yanahusiana na usawa wa jinsia na haki za wanawake kwa sababu alikuwa ni mwanaharakati wa masuala ya haki za kijinsia hasa wanawake,” amesema.
Mwenyekiti wa Bawacha, Suzan Lyimo, amesema amepokea kwa masikitiko taarifa za kifo, hasa kwa sababu amekuwa naye pamoja kwa muda mrefu alipokuwa Mwenyekiti wa Bawacha na Kaihula akiwa Katibu Mkuu.
Amesema mbali na taaluma yake ya ualimu, alikuwa mwanaharakati na aliwahi kufanya kazi na Mtandao wa Junsia Tanzania (TGNP), Shirika la Wanawake katika Sheria na Maendeleo Barani Afrika (WiLDAF) na Chama cha Wanasheria Wanawake Tanzania (Tawla).
“Alikuwa mwanamke kiongozi wa kupigiwa mfano, amefanya kazi zake vizuri, kwa hiyo nimepokea taarifa za kifo chake kwa mfadhaiko mkubwa. Tutamkumbuka kwa mengi lakini kubwa ni kuwa kiunganishi cha wanawake, siyo tu Chadema, bali kote alikofanya kazi,” amesema.
Lyimo amesema Kaihula alipenda usawa wa kijinsia kila sehemu aliyofanya kazi na alikuwa Katibu Mkuu wa kwanza wa Bawacha.
“Tumempoteza mwanaharakati, tumempoteza mtetezi wa haki za wanawake, ni mtu aliyekuwa sensitive kwenye masuala ya jinsia, hata bungeni alipambana sana kwenye masuala ya jinsia. Kwa hiyo, mabadiliko mengi tunayoyaona kwenye haya mashirika, kuna mchango wake mkubwa,” amesema.
Mwanaharakati wa haki za binadamu, Dk Hellen Kijo-Bisimba amesema atamkumbuka Kaihula kwa kuwa mstari wa mbele kupigani haki za binadamu hasa wanawake alipokuwa Mwenyekiti wa WiLDAF kwa zaidi ya miaka 10.
“Namkumbuka zaidi alipokuwa WiLDAF, amekuwa mwenyekiti wa taasisi hiyo kwa muda mrefu na tulishirikiana katika mambo mengi hasa kulinda haki za binadamu na kutetea haki za wanawake,” amesema.
Amesema alifanya kazi kubwa ya kupinga ukatili wa kijinsia hasa katika siku 16 za kupinga ukatili huo, akieleza pamoja na wenzake walitoa elimu kwa umma ili kukomesha unyanyasaji kwa wanawake.
Mwanafunzi anavyomkumbuka
Mmoja wa wanafunzi wake, Jackton Manyerere amesema anamfahamu Kaihula kama mwalimu wake aliyemfundisha elimu ya awali ya sekondari (O-Level) miaka ya 1990 katika Shule ya Sekondari ya Tambaza, jijini Dar es Salaam.
Manyerere amesema alimfundisha somo la Siasa, akieleza alimkuta shuleni Tambaza ambako mwalimu Kaihula alijiunga mwaka 1983 hadi mwaka 1994 alipoondoka.
“Alikuwa ni mtu mpole, muungwana, tulimpenda sana. Alikuwapo yeye na mwalimu mwingine aliyejulikana kama Mwalimu Pelekamoyo. Hao ndio walikuwa walimu wetu wa masomo ya Siasa na mengine ya Sanaa,” amesema.
Kwa mujibu wa Manyerere, wakati wakisoma Tambaza Mwalimu Kaihula alikuwa rafiki yao, alikuwa rafiki mpole na hata alipokuja kuwa mbunge aliendelea kufanya naye kazi.
“Sisi wana Tambaza tunasikitika, ndiyo tunajadili tuone tunafanyaje… mtoto wake naye katangulia, aliwahi kufanya kazi na Habari Corporation na kule mambo ya rambirambi yalikuwa yanaandaliwa, mama yake naye amefariki,” amesema Manyerere.
Kupitia mtandao wa Instagram, Martin Masese ameandika kuwa msiba wa Kaihula upo nyumbani kwake, maeneo ya Upanga, jijini Dar es Salaam.