Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Ridhiwani Kikwete amewataka wahitimu wa Chuo cha Utumishi wa Umma Tanzania (TPSC) kuwa mfano bora katika kuzingatia miiko na maadili ya utumishi wa umma kutokana na mafunzo wanayopata kutoka katika chuo hicho.
Kauli hiyo ameitoa wakati wa hafla ya mahafali ya 42 ya TPSC iliyofanyika Novemba 28, 2025 kwenye Ukumbi wa Kimataifa wa Mikutano wa Julius Nyerere (JNICC) jijini Dar es Salaam. Ridhiwani amesisitiza kuwa, katika kutekeleza Dira ya Taifa ya Maendeleo 2050, Chuo hicho kina jukumu la kutoa mwelekeo wa utumishi wa umma kwa kipindi cha miaka 25 ijayo kwa kuzalisha wahitimu ambao ni wazalendo na wanaoheshimu miiko na maadili ya utumishi wa umma.
“Mnatakiwa kuwa mfano bora katika kuzingatia miiko na maadili ya utumishi wa kwa kujiepusha na vitendo vinavyokiuka maadili ya utumishi wa ikiwemo rushwa na ubadhilifu. Pia mnatakiwa kujijali na kulinda afya zenu, kujiepusha na magonjwa, vilevi na mambo mengine ambayo yapo kinyume na maadili ya utumishi wa umma,” amesema Ridhiwani.
Mhe. Ridhiwani pia ameitaka TPSC kujipanga vyema kwa kuhakikisha kinaendelea kuzalisha watumishi wa umma watakaolisaidia Taifa katika kipindi hiki ambacho nchi inatekeleza Dira ya Maendeleo ya mwaka 2025-2050.
“Nchi yetu sasa inaingia katika utekelezaji wa Dira ya 2050, lazima kama chuo cha Utumishi wa Umma tujiulize utumishi wa Umma unakwenda wapi itakapofika mwaka 2050,” amesema Ridhiwani.
Ridhwani amesisitiza chuo hicho kuendelea kufanya tafiti tumizi zitakazoweza kuboresha mahitaji ya mafunzo kwa watumishi wa umma, changamoto zinazokabili utumishi wa umma nchini na mapendekezo ya utatuzi wake ili kuishauri Serikali jinsi ya kuboresha utumishi wa umma nchini.
Kwa upande wake Mkuu wa Chuo na Mtendaji Mkuu wa Chuo cha Utumishi wa Umma Tanzania , Dk Ernest Mabonesho amesema kuwa mahafali ya mwaka huu yamehusisha wahitimu 6,956 wa ngazi na kozi mbalimbali ambapo kati yao asilimia 32 ni wanaume na asilimia 68 ni wanawake.
Akizungumza kuhusu miaka 25 ya kuanzishwa kwa Chuo hicho Dk Mabonesho amesema wanajivunia mafanikio makubwa ikiwemo kuongezeka kwa kampasi kutoka mbili hadi sita, Kuboresha kozi za muda mfupi pamoja na rasilimali watu, ushirikiano na wadau mbalimbali, na kuboresha mchango wa chuo katika utumishi wa umma.
Mahafali hayo yalihudhuriwa na viongozi mbalimbali akiwemo Mkuu wa Mkoa wa Dar es Salaam, Albert Chalamila ambaye aliwakilishwa na Mkuu wa Wilaya ya Ilala, Edward Mpogolo, Mwenyekiti wa Bodi ya Ushauri ya chuo, Dk Florence Turuka na viongozi wengine.