Musoma. Mbunge wa Musoma Mjini (CCM), Mgore Miraji amewataka wanachama wa chama hicho kuepuka majungu na badala yake wafanye kazi kwa ushirikiano na uwazi ili kuleta maendeleo ya kweli katika jimbo hilo kwa maslahi ya wakazi wa jimbo kwa ujumla.
Amesema yeye sio muumini wa majungu huku akieleza kuwa majungu kwa namna moja ama nyingine ni miongoni mwa vitu vinavyosababisha kukwama kwa maendeleo katika eneo lolote hivyo asingependa kuona maenedeleo katika jimbo hilo yanakwamishwa kwa sababu sizokuwa na msingi.
Akizungumza na baadhi ya wanachama wa CCM na wakazi wa jimbo hilo leo Novemba 29, 2025 wakati wa mapokezi yake ikiwa ni mara ya kwanza kufanya hivyo tangu kuchaguliwa kuwa mbunge, Mgore amesema ataendelea kuwa mnyenyekevu na kuwatumikia kwa moyo mmoja kama alivyoahidi wakati wa kampeni.
“Niwaombe tuwe wa wazi,na tusimsingizie mtu yeyote, majungu ni adui mkubwa wa maendeleo tuachane nayo kabisa, tusichonganishane na tusipigane shoti, sisi sote ni wamoja kwa pamoja tunaweza kuipeleka mbele Musoma yetu,” amesema
Mgore amesema changamoto zote za Musoma chini ya uongozi wake zinatapatiwa ufumbuzi ili wakazi wa jimbo hilo waweze kuwa na maendeleo endelevu.
Amesema changamoto kubwa ya Musoma ni ajira na uchumi wa mtu mmoja mmoja na kwamba ili kupata suluhisho la kudumu katika changamoto hizo suala la uwekezaji na ufufuaji wa viwanda ni miongoni mwa vipaumbele vyake na huku akisema kazi ya kuwatafuta wawekezaji inakwenda kuanza rasmi.
Amesema katika kipindi cha miaka mitano atahakikisha anagusa kila sekta muhimu katika maendeleo ya watu, jamii na jimbo zima ili fursa na rasiliamli zilizopo ziweze kutumika vema na kuwanufaisha wakazi wa jimbo hilo.
Mgore amesema ili chama hicho kiweze kuendelea kuaminiwa kushika dola katika chaguzi zijazo ni lazima kutekelezwa kwa yale waliyoyaahidi na kwamba utekelezaji huo utawezekana pale ambapo wanachama wote watakuwa kitu kimoja.
“Sasa hivi tunapambania mafanikio ya CCM na sio ya Mgore wala diwani fulani,hakuna sababu ya kuwa na makundi isipokuwa kundi letu ni moja tu ambalo ni CCM na kwa hakika tukifanya hivyo tutatekeleza yale yote yaliyopo kwenye ilani yetu na kwenda mbele zaidi,” ameongeza
Baadhi ya wakazi wa Musoma wamewaomba wanasiasa hususan wa Chama cha Mapinduzi kuungana na kuwa kitu kimoja ili kuwaletea maendeleo na si vinginevyo.
“Ni kweli majungu ni kikwazo cha maendeleo penye majunngu hapana maendeleo kwasababu muda mwingi unatumika kwenye majungu,nimpongeze mbunge kwa kulitambua hili mapema na kulikekemea naamini atasimama kwenye huo msimamo wake ili kazi ziweze kufanyika,” amesema Ashura Jumanne
John Mahende amesema muda wa siasa umepita na kinachofuata ni utekelezaji wa ahadi ziliotolewa na viongozi waliopo madarakani hivyo mwananchi yeyote hapaswi kuwa kikwazo cha utekelezaji wa ahadi hizo kwa namna yoyote ile.
“Ni kweli tuna majungu sana, niwaombe wana Musoma wenzangu kuanzia viongozi wa kisiasa na wananchi wa kawaida kwa pamoja tuwaze maendeleo na si vinginevyo kwani tuko nyuma sana,hadhi ya mji wetu haiendani na hali halisi tunataka mji uchangamke kiuchumi na watu wake pia uchumi uwe juu,” amesema Nyamburi Eliya.