Baada ya kuitumikia Mbeya City kwa takribani miezi nane pekee, Kocha Mkuu, Malale Hamsini na wenzake wa benchi la ufundi wamesitishiwa mkataba leo Jumapili Novemba 30, 2025.
Hii ni baada ya matokeo yasiyoridhisha katika mechi tatu mfululizo timu hiyo ikipoteza dhidi ya Mashujaa bao 1-0, Coastal Union (2-0) na Namungo (1-0).
Hata hivyo, katika hali isiyo ya kawaida, baada ya mechi iliyopigwa leo Novemba 30, 2025 kwenye Uwanja wa Sokoine jijini hapa saa 8 mchana ambayo Mbeya City ilifungwa 1-0 na Namungo, mashabiki wa timu hiyo waliweka kikao cha dharula na uongozi na benchi la ufundi huku wakiazimia Kocha Malale na wenzake kuondoka.
Katika taarifa ya klabu hiyo iliyotolewa usiku wa leo Novemba 30, 2025, imetangaza kusitisha mkataba wa Kocha Malale, msaidizi wake Musa Rashid, Kocha wa makipa Wilbert Mweta na Daktari wa timu Hashrafu Mapunda.
Taarifa hiyo imeeleza hatua hiyo imefikiwa kutokana na kutoridhishwa na mwenendo wa matokeo kwenye Ligi Kuu na kuwatakia kheri katika majukumu yao mapya.
Malale alijiunga na Mbeya City Machi 31, 2025 timu ikiwa Ligi ya Championship akichukua mikoba ya Salum Mayanga alitetimkia Mashujaa na kufanikiwa kuipandisha daraja na sasa anaondoka baada ya kuiongoza katika mechi tisa za Ligi Kuu.
Katika mechi hizo, ameiacha Mbeya City ikiwa nafasi ya 10 katika msimamo wa ligi kwa pointi nane na sasa timu hiyo itakuwa chini ya Kocha Patrick Mwangata kwa muda kabla ya uongozi kumtangaza kocha mpya.