Rais wa Marekani Donald Trump, ambaye anaishutumu BBC kwa kuunda video inayopotosha na kuharibu sifa yake , aliwasilisha kesi dhidi ya shirika hilo la utangazaji la Uingereza Jumatatu, Desemba 15, akitaka fidia ya dola bilioni 10, ikiwa ni pamoja na kashfa, kulingana na hati za mahakama.
Imechapishwa:
Dakika 2 Wakati wa kusoma
Matangazo ya kibiashara
Kesi hiyo, iliyowasilishwa Florida na rais wa Marekani, inataka “fidia ya angalau dola bilioni 5” kwa kila moja ya mashtaka mawili: kashfa na ukiukaji wa sheria dhidi ya vitendo vya udanganyifu na visivyo vya haki vya biashara.
Shirika hili la utangazaji la Uingereza limejikuta katika utata kwa kutangaza, kabla tu ya uchaguzi wa urais wa Marekani wa mwaka 2024, dondoo tofauti kutoka kwa hotuba ya Donald Trump ya Januari 6, 2021, ambayo ilihaririwa kwa njia ambayo alionekana kuwataka wafuasi wake kushambulia Capitol huko Washington.
“Walinizushia,” bilionea huyo mwenye umri wa miaka 79 alilalamika kwa waandishi wa habari siku ya Jumatatu. BBC imejikuta katika utata kwa kutangaza, muda mfupi kabla ya uchaguzi wa rais wa Marekani wa 2024, katika kipindi chake kikuu cha “Panorama,” sehemu tofauti kutoka kwa hotuba ya Donald Trump mnamo Januari 6, 2021, kwa njia ambayo alionekana kuwataka wafuasi wake kushambulia Capitol huko Washington.
Siku hiyo, mamia ya wafuasi wake, wakiwa wamechochewa na shutuma zake zisizo na msingi za udanganyifu wa uchaguzi, walivamia hifadhi ya demokrasia ya Marekani katika jaribio la kuzuia uthibitisho wa ushindi wa Joe Biden.
Barua ya msamaha
“BBC, ambayo hapo awali iliheshimiwa na sasa imedharauliwa, ilimchafua Rais Trump kwa kubadilisha hotuba yake kimakusudi, kwa nia mbaya, na kwa udanganyifu kwa lengo la wazi la kuingilia uchaguzi wa urais wa mwaka 2024,” msemaji wa wanasheria wa rais huyo kutoka chama cha Republican aliambia shirika la habari la Agence France-Presse (AFP) siku ya Jumatatu.
Nchini Uingereza, utata huo umeibua mjadala kuhusu utendaji kazi wa shirika hili la utangazaji na kutoegemea upande wowote, kwani shirika hilo tayari limetikiswa katika miaka ya hivi karibuni na utata na kashfa kadhaa. Jambo hilo lilisababisha kujiuzulu kwa mkurugenzi mkuu wake, Tim Davie, na mkuu wa habari, Deborah Turness.
Mwenyekiti wa BBC, Samir Shah, alituma barua ya kuomba msamaha kwa Donald Trump, lakini ilishindwa kutuliza hasira yake. Hata hivyo, Kiongozi huyo alifutilia mbali tuhuma zilizotolewa na rais wa Marekani na kusema azma yake ya kupinga kesi yoyote ya kashfa.
Kesi ya Donald Trump inadai kwamba, licha ya kuomba msamaha, BBC “haijaonyesha majuto ya kweli kwa matendo yake wala kufanya mageuzi makubwa ya kitaasisi ili kuzuia kashfa za waandishi wa habari wa siku zijazo.”