Mauaji ya Charlie Kirk yalivyoibua simanzi na hofu ya visasi vya kisiasa Marekani

Marekani imegubikwa na simanzi na hofu baada ya mwanaharakati Charlie Kirk kuuawa hadharani.

Kirk alikuwa kijana maarufu Marekani kwa misimamo, mitazamo na itikadi zake za kihafidhina

Katika mtandao wake wa X alikuwa na wafuasi zaidi ya milioni 5 huku Podcast yake ilikuwa inawafikia watu zaidi ya laki 5 kila mwezi.

“Jabali, Charlie Kirk, ameaga dunia. Hakuna aliyewahi kuelewa au kuwa na moyo wa vijana wa Marekani kuliko Charlie,” aliandika Rais Trump.

Rais mstaafu Barack Obama, ambaye mitazamo yake inatofautiana na ile ya Kirk amelaani tukio hilo na kutuma salamu za pole kwa familia ya Kirk.

“Hatujui bado nini kilimchochea mtu aliyempiga risasi na kumuua Charlie Kirk, lakini aina hii ya ukatili wa kutisha haina nafasi katika demokrasia yetu,” ameandika Obama.

Kirk alianza harakati akiwa na umri wa miaka 18 tu, ambapo alianzisha shirika aliloliita Turning Point USA.

Akikulia katika jimbo la Chicago, kijana huyu aliacha hata shule na kuweka nguvu na muda mwingi katika harakati.

Vuguvugu lake lilikuwa na wafuasi wengi kuliko vuguvugu lolote Marekani, ambapo aliwalenga vijana wa taifa hilo, hasa walioko vyuoni.

Alianzisha mkakati wa kuzunguka chuo kimoja baada ya kingine, ikiwa ni pamoja na kuweka hema alilolitumia kufanya midahalo juu ya misimamo na itikadi za kihafidhina.

Alipigwa risasi shingoni siku ya Jumatano akiwa katika tukio kama hilo katika chuo kikuu kiitwacho Utah Valley University (UVU).

Mara nyingine alitembelea hata nchi za nje ya Marekani, kama Uingereza na kwenda kufanya midahalo katika vyuo vikuu kama Oxford na Cambridge.

Baadhi ya misimamo yake mikali ilikuwa ni pamoja na kupinga utoaji mimba, hata katika mazingira ya ubakaji.

Kirk alikuwa ni baba wa watoto wawili na mume wa binti aliyewahi kuwa Miss Arizona.

Mitazamo na misimamo yake ilikwendana na ile ya Rais Donald Trump, na kumfanya kuwa karibu na Trump mwenyewe na familia yake.

Alikuwa kinara wa haki ya kumiliki silaha, akienda mbali hata kusema gharama ya watu kupoteza maisha kwa sababu ya bunduki ni sawa kabisa.

Mauaji yake yamewasononesha sana wafuasi wa vuguvugu lijulikanalo kama MAGA (Make America Great Again) ambalo amechangia kwa kiasi kikubwa kuliuhisha.

Trump anasema ni Kirk ndiye alisababisha vijana wengi, hasa walioko vyuoni kufanya uamuzi wa kumpigia kura katika uchaguzi wake wa mwaka 2024.

Lakini mauaji yake pia yameibua wasiwasi wa kulipiza kisasi au kwamba ndiyo itakuwa mwanzo wa kushambuliwa kwa wanasiasa na wanaharakati kwa sababu tu ya misimamo yao ya namna moja au ya pili.