Nchini Mali, jeshi la Mali linashutumiwa kuwaua raia saba katika eneo la mpakani na Mauritania na Senegal. Vyanzo vingi vya ndani vinashutumu Jeshi la Mali (FAMA). Hili ni eneo ambalo makundi ya wanajihadi yanaendesha harakati zao. Mamlaka ya Mali haijatoa taarifa yoyote kufuatia vifo hivyo.
Imechapishwa:
Dakika 1 Wakati wa kusoma
Matangazo ya kibiashara
Matukio hayo yalitokea Februari 26. Wakazi wa Aïté, waliowasiliana na RFI, wamethibitisha kuwasili kwa doria ya wanajeshi wa Mali katika mji wao. Watu watano, wafanyabiashara wenye uraia wa Mali na Mauritania, walikamatwa mara moja katika maduka yao.
Kulingana na mwanachama wa mashirika ya kiraia, msafara huo kisha ulielekea kwenye eneo la uchimbaji madini ambapo wafanyabiashara wengine wawili, Wamauritania, walikamatwa. Mali na bidhaa zao zilichomwa moto.
Hofu na wasiwasi miongoni mwa wakazi
Baada ya hapo, watu hao saba walichukuliwa na Jeshi la Mali (FAMA). Mkazi, binamu wa kwanza wa mmoja wa wanaume hao waliokamatwa, na wanakijiji wengine walijaribu kuwatafuta. Waligundua miili saba kilomita 7 kutoka mji huo. “Waliuawa,” alisema mmoja wa wanachama wa kundi lililohusika na utafutaji, akiongeza, “Tuliogopa kwamba miili hiyo huenda ilitegwa mabomu; hatukuthubutu kuwagusa.”
Siku ya Jumatatu, siku kumi tu baada ya matukio hayo, ndipo miili ya watu hao ilizikwa. Operesheni hii ilisababisha hofu na wasiwasi, kwani wakazi wengi wa Aïté, pamoja na vijiji jirani, walikimbilia Mauritania, ambapo mpaka wake uko kilomita 10 tu kutoka mji huo.