Mradi mkuu wa uwepo wa China barani Afrika umeanzishwa tena. Mnamo Machi 21, Marais wa Kenya na Uganda William Ruto na Kaguta Museveni wamekutana karibu na mpaka wao wa pamoja ili kuzindua upya mradi wa upanuzi wa reli, ambao hatimaye utaunganisha Mombasa nchini Kenya na Malaba nchini Uganda.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu huko Beijing, Clea Broadhurst
Mradi huo uliofadhiliwa awali na Beijing, ulisitishwa kwa miaka sita kutokana na ukosefu wa ufadhili na huku kukiwa na ukosoaji kuhusu deni lake. Kuzinduliwa kwake tena leo sio tu kunaashiria kuanza upya kwa ujenzi lakini pia kunaonyesha mabadiliko makubwa katika jinsi China inavyofadhili miradi yake mikubwa Afrika.
Kuanza tena kwa upanuzi wa reli hadi Uganda kunafanyika chini ya sheria mpya. China bado inahusika, haswa kupitia kampuni ya ujenzi ya China Road and Bridge Corporation, lakini sio mfadhili mkuu tena.
Kenya sasa inategemea rasilimali zake: kodi ya uagizaji, iliyobadilishwa kuwa kichocheo cha kifedha, kwa lengo la kukusanya hadi dola bilioni nne ili kusonga mbele licha ya deni ambalo limekuwa gumu kulihimili.
Mradi huo, uliokosolewa kwa muda mrefu kama “njia ya reli inayokwenda patupu,” pia unaonyesha mwisho wa enzi: ile ya mikopo mikubwa ya China iliyoashiria mwanzo wa Barabara Mpya za Hariri. China sasa inafanya kazi zaidi kama mshirika wa viwanda kuliko kama mfadhili mkuu.
Mpango huu mseto zaidi unaonyesha mabadiliko mapana. Beijing inapunguza mikopo yake barani Afrika, huku Kenya, ikiwa chini ya shinikizo la bajeti na ikichunguzwa na Shirika la Fedha la Kimataifa (IMF), inatafuta nafasi mpya ya uendeshaji. Kwa Nairobi, changamoto ni kuendelea na mradi muhimu licha ya rasilimali chache. Kwa China, lengo ni kuendelea kuwa muhimu, bila kubeba hatari pekee.