Kashfa ya kifedha inatikisa serikali ya Kinshasa baada ya kugunduliwa siku ya Jumamosi ya wiki iliyopita kwa kiasi kikubwa cha pesa. Ingawa mamlaka hapo awali ziliripoti karibu dola milioni mbili zilizofichwa kwenye masanduku katika Uwanja wa Ndege wa Kimataifa wa Ndjili, Waziri wa Sheria hatimaye amebainisha kwamba dola milioni 3.4 za Marekani ziligunduliwa. Watu wawili wamekamatwa, lakini mmiliki halisi wa fedha hizo bado hajulikani, kulingana na vyanzo vyetu.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu huko Kinshasa, Pascal Mulegwa
Kati ya dola milioni 3.4 zilizokamatwa uwanja wa ndege, ni dola milioni 1.9 pekee ndizo zilizotangazwa kwa mamlaka hapo awali. Tofauti hiyo, takriban dola milioni 1.6, sasa inachochea tuhuma za jaribio la kutumia vibaya baadhi ya fedha hizo baada ya kukamatwa. Kutokana na ufichuzi huu, Waziri wa Sheria aliingilia kati kutoka Ubelgiji, ambapo anashirikiana na Mwendesha Mashtaka Mkuu katika Mahakama ya Juu.
Soma piaDRC: Masanduku yenye dola milioni mbili yakamatwa katika uwanja wa ndege wa Kinshasa
Amelaani mpango wa kugawa fedha hizo na kuagiza uchunguzi ufanyike. Siku ya Jumanne, dola milioni 3.4 zote, zilizokuwa kwenye masanduku mawili, hatimaye zilipatikana na mamlaka na kuwekwa chini ya ulinzi wa Benki Kuu ya Kongo. Raia wawili wa Kongo, waliokuwa wakisafirisha fedha hizo, walikamatwa. Utambulisho wao haujawekwa wazi kutokana na uchunguzi unaoendelea.
Kulingana na vyanzo kadhaa vya uwanja wa ndege, uhamisho huu wa siri wa pesa kupitia Uwanja wa Ndege wa Ndjili si tukio la kipekee. Kama operesheni hiyo ilishindwa wakati huu, huenda ni kutokana na kutokubaliana miongoni mwa waliohusika, huku mamlaka zikisisitiza uangalifu wa idara za usalama. Wakati huo huo, Benki Kuu imetajwa katika video iliyosambaa ikionyesha kitita kikubwa cha fedha katika chumba cha hoteli, ikiwa ni pamoja na bafuni.
Mtu aliyechapisha video hiyo anadai kwamba fedha hizo zilitoka katika taasisi hiyo. Uchunguzi wa ndani pia umetangazwa.