Katika taarifa iliyotolewa tarehe 6 Aprili 2026 mjini Geneva, Uswisi, WHO imesema maadhimisho hayo pia yanaadhimisha kumbukumbu ya kuanzishwa kwa shirika hilo tarehe 7 Aprili 1948, huku yakizindua kampeni ya mwaka mzima ya kuhamasisha afya ya umma duniani.
Mafanikio ya sayansi yaokoa mamilioni ya maisha
WHO imeeleza kuwa maendeleo ya kisayansi na ushirikiano wa kimataifa yamechangia kwa kiasi kikubwa kuboresha afya duniani. Miongoni mwa mafanikio hayo ni kupungua kwa vifo vya uzazi kwa zaidi ya asilimia 40 tangu mwaka 2000, pamoja na kupungua kwa vifo vya watoto wenye umri wa chini ya miaka mitano kwa zaidi ya asilimia 50.
Aidha, ubunifu wa kisayansi kama chanjo, matumizi ya dawa ya penicillin, teknolojia za uchunguzi kama MRI, na utafiti wa vinasaba vya binadamu umeokoa maisha ya mabilioni ya watu duniani.
Licha ya mafanikio, changamoto za afya zaendelea kuongezeka
Pamoja na mafanikio hayo, WHO imeonya kuwa changamoto za afya zinaendelea kuongezeka kutokana na athari za mabadiliko ya tabianchi, uharibifu wa mazingira, migogoro ya kisiasa na mabadiliko ya idadi ya watu.
Shirika hilo limesema pia kuwa magonjwa mapya na milipuko ya magonjwa yanaendelea kuwa tishio kubwa kwa jamii, hivyo kuhitaji juhudi za pamoja za kisayansi na kisera.
Ushirikiano wa kimataifa waimarishwa
Katika kuimarisha juhudi hizo, WHO inaendelea kushirikiana na watafiti na taasisi mbalimbali duniani ili kuendeleza utafiti, sera na ubunifu wa kulinda afya za sasa na za vizazi vijavyo.
Aidha, kwa kushirikiana na urais wa kundi la G7 unaoongozwa na Ufaransa, mkutano wa “One Health” umeandaliwa mjini Lyon, huku zaidi ya taasisi 800 za utafiti kutoka zaidi ya nchi 80 zikitarajiwa kushiriki kupitia jukwaa la kimataifa la vituo shirikishi.
Sayansi ndio msingi wa maamuzi ya kiafya
WHO imesisitiza kuwa sayansi inapaswa kuwa msingi wa maamuzi yote ya afya katika ngazi za kitaifa na kimataifa. Shirika hilo limetoa wito kwa serikali, taasisi na watu binafsi kuongeza ushirikiano ili kuhakikisha sera na hatua za afya zinazingatia ushahidi wa kisayansi.
Kwa mantiki hiyo, hatua za pamoja ni muhimu ili kulinda afya za watu na kujenga mustakabali bora kwa vizazi vijavyo.