YANGA imeendeleza ubabe katika Ligi Kuu Bara ikiichapa Pamba Jiji mabao 3-0 yaliyofungwa na Mudathir Yahya mawili na Maxi Nzengeli moja na kutanua rekodi ya mabingwa hao huku ikiivunja ya wenyeji wao waliokuwa hawajapoteza nyumbani msimu huu.
Ushindi huo wa leo Aprili 8, 2026 kwenye Uwanja wa CCM Kirumba jijini Mwanza, unakuwa wa 13 kwa Yanga katika Ligi Kuu Bara na kuifanya kuendelea kujichimbia kileleni mwa msimamo ikifikisha pointi 44, ikicheza michezo 18, ikiiachia Simba itakayokuwa uwanjani kesho dhidi ya TRA United iliyoko nafasi ya pili, kuendelea kuwafukuza ingawa wekundu hao wana michezo miwili pungufu.
Haikuwa ngumu Yanga kupata ushindi huo ambapo ilimaliza dakika 45 za kwanza ikiongoza kwa mabao 2-0 yakifungwa na kiungo Mudathir Yahaya dakika ya 8 na 33 yakitosha kuilainisha mechi hiyo.
Mabao hayo mawili yamemfanya Mudathir kuongoza kwa ufungaji kwenye klabu yake akifikisha saba akiwashusha chini washambuliaji wa timu hiyo, Prince Dube na Laurindo Aurellio ‘Depu’ wenye mabao sita kila mmoja.
OKELLO ASISTI TATU
Mabao hayo ya Yanga yalifungwa na viungo wawili tofauti lakini kwa Allan Okello aliondoka uwanjani na pasi tatu za mabao, akiendelea kuonyesha ubora mkubwa kwenye kutengeneza nafasi tangu acheze nafasi ya kiungo mshambuliaji akifikisha asisti nne na mabao mawili, hivyo kuhusika katika jumla ya mabao sita.
Kipindi cha pili Yanga iliendeleza moto wake ikipata bao la tatu kupitia kwa kiungo mwingine Maxi Nzengeli na kuipoteza zaidi Pamba Jiji.
MECHI 38 BILA KUPOTEZA
Yanga imeendelea kutanua rekodi yake ya kutopoteza mechi kwenye ligi, ikifikisha michezo 38 bila kupoteza ambapo mara ya mwisho kupoteza ilikuwa Novemba 7, 2024 ilipopoteza nyumbani kwa mabao 3-1 dhidi ya TRA United wakati huo ikiitwa Tabora United.
YAIHARIBIA PAMBA
Kabla ya mchezo huo wa leo, Pamba jiji ilikuwa haijapoteza nyumbani msimu huu katika mechi tisa ikishinda tano na sare nne, lakini kipigo hicho cha Yanga ikawatibulia na kupoteza kwa mara ya kwanza.
NO DIARRA, NO PROBLEM
Yanga iliondoka uwanjani kwa mchezo wa pili mfululizo bila wavu wake kutikiswa ikitumia makipa wawili tofauti tangu kusimamishwa kwa Djigui Diarra anayetumikia adhabu ya kukosa mechi tatu, akibakisha moja kwenye adhabu yake.
Yanga leo golini alikuwa kipa Hussein Masalanga ambaye alipata klinshiti yake ya kwanza kwenye mchezo wake wa kwanza Ligi Kuu Bara akiwa na Yanga. Mchezo uliopita kipa alikuwa Aboutwalib Mshery ambaye hakuonekana uwanjani wala benchi.